ការិយាល័យស្ថិតិរបស់សហភាពអឺរ៉ុប (EU) បានឲ្យដឹងនៅក្នុងការប៉ាន់ប្រមាណមួយ កាលពីថ្ងៃព្រហស្បតិ៍ (ទី៣១ ខែសីហា) ថា អតិផរណាប្រចាំឆ្នាំ នៅក្នុងតំបន់ចាយប្រាក់អឺរ៉ូ នៅតែមានស្ថិរភាព ក្នុងកម្រិត ៥,៣ភាគរយ នៅក្នុងខែសីហា ដោយមិនមានការប្រែប្រួលអ្វីឡើយពីខែកក្កដា។

បើយោងតាមរិយាល័យនេះ បានឲ្យដឹងថា តម្លៃម្ហូបអាហារ គ្រឿងស្រវឹង និងថ្នាំជក់ គឺជាកត្តាជំរុញចម្បងនៃអតិផរណា ដែលមានកម្រិត ៩,៨ភាគរយ ដោយធ្លាក់ចុះពី ១០,៨ភាគរយ នៅក្នុងខែកក្កដា។ តម្លៃសេវាកម្ម បានកើនឡើង ៥,៥ភាគរយ បើធៀបនឹងឆ្នាំមុន ក្នុងខែសីហា និងធៀបនឹងកម្រិត ៥,៦ភាគរយ នៅក្នុងខែកក្កដា។

អតិផរណាទំនិញឧស្សាហកម្មមិនប្រើថាមពល គឺមាន ៤,៨ភាគរយ នៅក្នុងខែសីហា ដោយធ្លាក់ចុះពី ៥ភាគរយ ក្នុងខែកក្កដា។ តម្លៃថាមពល បានធ្លាក់ចុះ ៣,៣ភាគរយធៀបនឹងឆ្នាំមុន ក្នុងខែសីហា បន្ទាប់ពីការធ្លាក់ចុះ ៦,១ភាគរយ នៅខែកក្កដា។

ប្រទេសដែលមានអត្រាអតិផរណាប្រចាំឆ្នាំខ្ពស់បំផុតសម្រាប់ខែសីហា រួមមាន ស្លូវ៉ាគី (៩,៦ ភាគរយ) ក្រូអាត (៨,៥ភាគរយ) និងអូទ្រីស (៧,៦ ភាគរយ)។ អត្រាអតិផរណាទាបបំផុត បើធៀបនឹងឆ្នាំមុន មាននៅប្រទេសបែលហ្ស៊ិក និងអេស្ប៉ាញ (២,៤ភាគរយ) ស៊ីប និងក្រិក (៣ភាគរយ) ហើយហូឡង់ និងហ្វាំងឡង់ (៣,៤ភាគរយ)៕