រដ្ឋមន្ត្រីក្រសួងកសិកម្មរបស់ប្រទេសជប៉ុន កាលពីថ្ងៃព្រហស្បតិ៍ (ទី៣១ ខែសីហា) បានហៅទឹកសំណល់ Fukushima nuke ដែលត្រូវបានបញ្ចេញទៅក្នុងមហាសមុទ្រថាជា «ទឹកមានមេរោគ» ជំនួសឲ្យពាក្យ «ទឹកធ្វើប្រព្រឹត្តិកម្មរួចហើយ» ដែលសម្ដីនេះបានបង្កឲ្យមានការរិះគន់ពីនាយករដ្ឋមន្ត្រី លោក Fumio Kishida។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក Tetsuro Nomura បានប្រាប់អ្នកសារព័ត៌មានបន្ទាប់ពីជំនួបរបស់លោកជាមួយលោក Kishida នៅឯវិមាននាយករដ្ឋមន្ត្រីថា៖ «យើងបានផ្លាស់ប្តូរព័ត៌មានស្តីពីការវាយតម្លៃជាបន្តបន្ទាប់នៃទឹកកខ្វក់នេះ»។

បើយោងតាមប្រព័ន្ធផ្សព្វផ្សាយក្នុងស្រុក បានឲ្យដឹងថា ការជ្រើសរើសប្រើពាក្យសម្ដីរបស់លោក Nomura បានធ្វើឱ្យនាយករដ្ឋមន្ត្រីខឹងសម្បាយ៉ាងខ្លាំង ដែលបាននិយាយថា លោកបានឃើញនូវសេចក្តីថ្លែងការណ៍ «គួរឱ្យសោកស្តាយ» ហើយបានណែនាំឲ្យមានការសុំទោស និងការដកសេចក្តីថ្លែងការណ៍នេះ។

សូមបញ្ជាក់ថា ដោយរងការវាយប្រហារដោយការរញ្ជួយដី និងរលកយក្សស៊ូណាមិ ក្នុងឆ្នាំ២០១១ រោងចក្រថាមពលនុយក្លេអ៊ែរ Fukushima Daiichi បានទទួលរងនូវការរលាយស្នូលដែលបញ្ចេញវិទ្យុសកម្ម ដែលបណ្តាលឲ្យមានឧបទ្ទវហេតុនុយក្លេអ៊ែរកម្រិត៧។ រោងចក្រនេះបាននិងកំពុងបង្កើតបរិមាណដ៏ច្រើននៃទឹកដែលមានសារធាតុវិទ្យុសកម្ម ហើយការបញ្ចេញទឹកនេះគ្រោងនឹងបន្តអស់រយៈពេលជាង ៣០ឆ្នាំ។

ក្នុងខណៈដែលរដ្ឋាភិបាលជប៉ុន ធ្វើអ្វីៗគ្រប់យ៉ាង ដែលអាចធ្វើទៅបាន ដើម្បីផ្សព្វផ្សាយជាសាធារណៈអំពីសុវត្ថិភាពនៃទឹកវិទ្យុសកម្ម ពាក្យថា «ទឹកដែលត្រូវបានធ្វើប្រព្រឹត្តិកម្មហើយ» ជាទូទៅត្រូវបានប្រើដើម្បីសំដៅលើ «ទឹកដែលមានជាតិកខ្វក់ដោយនុយក្លេអ៊ែរ» ដែលមានបំណងកាត់បន្ថយលក្ខណៈនៃការបំពុល និងគ្រោះថ្នាក់ដែលអាចកើតមាន៕