​

មេដឹកនាំរដ្ឋប្រហាររបស់ប្រទេសហ្គាបុង លោក Brice Oligui Nguema ( ប៊្រីស អូលីហ្គី ង្វែម៉ា) កាលពីថ្ងៃសុក្រ បាននិយាយថា គោលបំណងរបស់លោកគឺដើម្បីជៀសវាងការបោះឆ្នោតដែលធ្វើឲ្យមានកំហុសដូចគ្នាច្រំដែល ខណៈសម្ពាធបានកើនឡើងលើរបបយោធាដើម្បីឲ្យប្រគល់អំណាចទៅឱ្យរដ្ឋាភិបាលស៊ីវិលវិញ បន្ទាប់ពីពួកគេបានផ្តួលរំលំប្រធានាធិបតីលោក Ali Bongo ។

មន្ត្រីយោធា បានដណ្តើមអំណាចកាលពីថ្ងៃពុធ ទី៣០ខែ សីហា ប៉ុន្មាននាទីបន្ទាប់ពីមានការប្រកាសថា លោក Bongo ទទួលបានអាណត្តិទីបីនៅក្នុងការបោះឆ្នោត។

ក្រុមមន្ត្រីបានឃុំខ្លួនលោក Bongo ក្នុងផ្ទះ និងបានតែងតាំងលោក Nguema ជាមេដឹកនាំអន្តរកាល។ ការដណ្តើមកាន់កាប់អំណាចនេះ បានបញ្ចប់ការគ្រប់គ្រងអំណាចរយៈពេល ៥៦ ឆ្នាំរបស់គ្រួសារលោក Bongo ។

រដ្ឋប្រហារនេះ គឺជាលើកទីប្រាំបីនៅអាហ្វ្រិកខាងលិច និងភាគកណ្តាល ក្នុងរយៈពេលបីឆ្នាំមកនេះ ដែលបានបណ្តាលឲ្យហ្វូងមនុស្សអបអរសាទរនៅតាមដងផ្លូវក្នុងរដ្ឋធានី Libreville ប៉ុន្តែមានការថ្កោលទោសពីបរទេស និងក្នុងស្រុក។