ប្រធានទីភ្នាក់ងារអវកាសរុស្ស៊ី Roscosmos បានប្រកាសការដាក់ពង្រាយប្រភេទមីស៊ីលបាលីស្ទីកអន្តរទ្វីបប្រភេទថ្មីរបស់ប្រទេស។ ប្រព័ន្ធផ្សព្វផ្សាយរុស្ស៊ី បានដកស្រង់សម្តីលោក Yuri Borisov ដែលបាននិយាយកាលពីថ្ងៃសុក្រថា ប្រព័ន្ធមីស៊ីលដែលគេស្គាល់ថា Sarmat ត្រូវបានដាក់ចូលទៅក្នុង «កាតព្វកិច្ចប្រយុទ្ធ» ។

ប្រធានាធិបតី លោក វ្ល៉ាឌីមៀ ពូទីន បាននិយាយអំពីមីស៊ីលនេះរយៈពេលមួយឆ្នាំមកហើយ ដោយកាលពីពេលមុនបាននិយាយថា វានឹងរួចរាល់សម្រាប់ការប្រើប្រាស់ក្នុងពេលដ៏ខ្លីខាងមុខ។ ប្រព័ន្ធមីស៊ីល Sarmat មានសមត្ថភាពផ្ទុកក្បាលគ្រាប់នុយក្លេអ៊ែរចំនួន ១០គ្រាប់ឬច្រើនជាងនេះ។

លោក ពូទីន បាននិយាយថា វាអាចយកឈ្នះលើគ្រប់មធ្យោបាយទំនើបៗទាំងអស់នៃការការពារប្រឆាំងមីស៊ីល។ លោកអះអាងថា វានឹងជួយការពាររុស្ស៊ីពីអ្វីដែលលោកហៅថាជា «ការគំរាមកំហែងពីខាងក្រៅ»។ មេដឹកនាំនៅទីក្រុងមូស្គូ បាននិងកំពុងបង្កើនវោហាសាស្ត្រនុយក្លេអ៊ែររបស់ពួកគេ ខណៈការបាត់បង់របស់ពួកគេកើនឡើងនៅលើសមរភូមិ។

មេបញ្ជាការអ៊ុយក្រែន បាននិយាយថា កាលពីសប្តាហ៍មុន ពួកគេបានទទួលជោគជ័យក្នុងការរំដោះភូមិ Robotyne នៅភាគអាគ្នេយ៍។ អនុរដ្ឋមន្ត្រីការពារជាតិ លោកស្រី Hanna Maliar បាននិយាយកាលពីថ្ងៃសុក្រថា ទោះបីជាស្ថិតនៅក្នុងលក្ខខណ្ឌដែលសត្រូវមានអ្នកប្រយុទ្ធច្រើន និងអាវុធកាន់តែច្រើនបន្ថែមទៀតក៏ដោយ កងទ័ពរបស់ពួកគេកំពុងបន្តរុលទៅមុខបានយឺតៗប៉ុណ្ណោះ។

ទោះបីជាមានការបាត់បង់ច្រើនក៏ដោយ ក៏ទាហានរុស្ស៊ីបានចំណាយពេលជួបជាមួយសម្ព័ន្ធមិត្តរបស់ពួកគេសម្រាប់សមយុទ្ធបណ្តុះបណ្តាល។ ទាហានជាង ២.៥០០នាក់ បានមកប្រមូលផ្តុំគ្នាក្រោមសម្ព័ន្ធភាពដែលគេស្គាល់ថាជាអង្គការសន្ធិសញ្ញាសន្តិសុខសមូហភាព។