អង្គភាពសេវាពន្ធនាគារ (SNAI) បាននិយាយថា អ្នកទោសនៅក្នុងពន្ធនាគារប្រទេសអេក្វាឌ័រចំនួន៦បានដោះលែងឆ្មាំពន្ធនាគារចំនួន៥០ នាក់ និងមន្ត្រីនគរបាលចំនួន៧ នាក់ដែលពួកគេបានចាប់ធ្វើជាចំណាប់ថ្នូរ។ 

យោងតាមអង្គភាពនេះបានឲ្យដឹងថា ចំណាប់ខ្មាំង ៥៧ នាក់ដែលត្រូវបានដោះលែង កំពុងស្ថិតក្រោមការវាយតម្លៃផ្នែកវេជ្ជសាស្ត្រ ប៉ុន្តែទំនងជាមានសុខភាពល្អ។ ក្រុមមន្ត្រី បាននិយាយថា ការចាប់ជំរិតនេះត្រូវបានសម្របសម្រួលដោយក្រុមអន្ធពាលឧក្រិដ្ឋជនដែលខឹងសម្បារចំពោះបំណងដើម្បីទប់ស្កាត់អំណាចរបស់ពួកគេ។ ការបំផ្ទុះរថយន្តពីរលើក បានផ្ទុះនៅក្បែរអគារនគរបាលក្នុងរដ្ឋធានីគីតូ(Quito) ក៏ត្រូវបានដាក់កំហុសលើក្រុមជនអន្ធបាលផងដែរ។

អាជ្ញាធរជឿថា យ៉ាងហោចណាស់ឧបទ្ទវហេតុមួយក្នុងចំណោមឧបទ្ទវហេតុជាច្រើនអាចជាការសងសឹកចំពោះការស្វែងរកអាវុធរបស់នគរបាលនៅពន្ធនាគារធំបំផុតមួយរបស់ប្រទេស។ 

មន្ត្រីនគរបាល និងទាហានរាប់រយនាក់ បានស្វែងរកនៅពន្ធនាគារកូតូប៉ាស៊ី(Cotopaxi) ក្នុងទីក្រុង ឡាតាគូអ៊ុនហ្គា(Latacuunga) មានចម្ងាយប្រមាណ៨៨ គីឡូម៉ែត្រ ភាគខាងត្បូងទីក្រុង Quito ជាផ្នែកនៃកិច្ចខិតខំប្រឹងប្រែងដើម្បីទប់ស្កាត់អំពើហិង្សាបន្ថែមទៀតនៅពន្ធនាគារកាលពីថ្ងៃពុធ។ បច្ចុប្បន្ននេះសកម្មភាពធម្មតាត្រូវបានបន្តឡើងវិញនៅក្នុងអគារពន្ធនាគារទាំង៦ រួមទាំងអង្គភាពជនល្មើសវ័យក្មេងដែលត្រូវបានបំផ្លាញធ្ងន់ធ្ងរដោយការវាយប្រហារដោយការដុតភ្លើង។ 

ប្រធានាធិបតី លោក ហ្គីលឺម៉ូ ឡាសូ(Guillermo Lasso) បាននិយាយនៅលើបណ្តាញ X ដែលគេស្គាល់ពីពេលមុនថា Twitter កាលពីយប់ថ្ងៃសុក្រថា ចំណាត់ការដែលយើងបានអនុវត្ត ជាពិសេសនៅក្នុងប្រព័ន្ធពន្ធនាគារ បានបង្កើតឱ្យមានប្រតិកម្មហឹង្សាពីអង្គការឧក្រិដ្ឋជនដែលព្យាយាម បំភិតបំភ័យ រដ្ឋ។