លោកប្រធានាធិបតីកាហ្សាក់ស្ថាន លោក Kassym-Jomart Tokaev ( កាស៊ីម ចូម៉ាត ថូកាយេវ) បាននិយាយ កាលពីថ្ងៃសុក្រ (ថ្ងៃទី១ ខែកញ្ញា) ថា ប្រទេសរបស់លោក នឹងធ្វើប្រជាមតិមួយ ដើម្បីសម្រេចថា តើត្រូវសាងសង់រោងចក្រថាមពលនុយក្លេអ៊ែរដំបូងរបស់ខ្លួន ឬយ៉ាងណា ដោយលោកបន្ថែមថា កាលបរិច្ឆេទនឹងត្រូវបានសម្រេចនៅពេលក្រោយ។

រដ្ឋាភិបាលរបស់ប្រទេសអាស៊ីកណ្តាលមួយនេះ បានពិភាក្សាគ្នាជាយូរមកហើយអំពីគោលបំណងនេះ ដោយលើកឡើងពីតម្រូវការ ដើម្បីបង្កើតសមត្ថភាពផលិតថាមពលថ្មី ហើយថែមទាំងបានកំណត់ទីតាំង ដែលបានគ្រោងទុកសម្រាប់ការសាងសង់រោងចក្រនេះ នៅតំបន់ Almaty ភាគអាគ្នេយ៍ និងបាននិយាយដល់ក្រុមហ៊ុន Rosatom របស់រុស្ស៊ីថា ទំនងក្លាយជាដៃគូសហការ។

ប៉ុន្តែសកម្មជនមួយចំនួន បានជំទាស់នឹងគម្រោងនេះ ដោយសារតែការព្រួយបារម្ភអំពីសុវត្ថិភាព និងប្រវត្តិសាស្រ្តរបស់ប្រទេសកាហ្សាក់ស្ថាន ដែលជាកន្លែង សម្រាប់កន្លែងសាកល្បងអាវុធនុយក្លេអ៊ែរ Semei ដែលដំណើរការដោយសហភាពសូវៀត។

លោក Tokaev បានពន្យល់ពាក់ព័ន្ធនឹងការចាប់ផ្ដើមធ្វើប្រជាមតិនេះថា៖ «ដោយសារម្យ៉ាង កាហ្សាក់ស្ថាន ក្នុងនាមជាប្រទេសផលិតអ៊ុយរ៉ានីញ៉ូមដ៏ធំបំផុតរបស់ពិភពលោក គួរណាស់តែមានថាមពលនុយក្លេអ៊ែរផ្ទាល់ខ្លួន ហើយម្យ៉ាងវិញទៀត ប្រជាពលរដ្ឋជាច្រើន និងអ្នកជំនាញមួយចំនួន មានការព្រួយបារម្ភអំពីសុវត្ថិភាពនៃរោងចក្រថាមពលនុយក្លេអ៊ែរ»៕