ភ្លៀង និងខ្យល់បក់បោកដ៏ខ្លាំងក្លា បានវាយប្រហារទីក្រុង Shenzhen នៅថ្ងៃសៅរ៍ (ថ្ងៃទី២ ខែកញ្ញា) នេះ ខណៈដែលព្យុះទីហ្វុង Saola បានបោកបក់មកដីគោកនៅភាគខាងត្បូងប្រទេសចិន ដោយបានបណ្តាលឲ្យមនុស្សយ៉ាងហោចណាស់ម្នាក់ស្លាប់ រីឯផ្លូវរងការបំផ្លិចបំផ្លាញ ហើយតំបន់ជាច្រើន ត្រូវជន់លិច។

ប្រព័ន្ធផ្សព្វផ្សាយ ក្នុងស្រុក បានរាយការណ៍ថា គេឃើញបំណែកកម្ទេចកម្ទីនៃដើមឈើ ដែលត្រូវបានខ្យល់បក់រំលើង នៅជុំវិញទីក្រុង Shenzhen ជាកន្លែងដែលមនុស្សម្នាក់ បានស្លាប់ បន្ទាប់ពីដើមឈើមួយដើម បានដួលរលំលើរថយន្តរបស់ពួកគេ។

កាលពីថ្ងៃសុក្រ (ថ្ងៃទី១ ខែកញ្ញា) ភាគខាងត្បូងខេត្ត Guangdong របស់ប្រទេសចិន បានលុបចោលជើងហោះហើររាប់រយ ហើយអាជីវកម្ម សាលារៀន និងទីផ្សារហិរញ្ញវត្ថុ ត្រូវបានផ្អាកដំណើរការ ខណៈដែលព្យុះ Saola បានបក់បោកមកកាន់តែជិត។ តែប្រតិបត្តិករផ្លូវដែក បាននិយាយថា ប្រតិបត្តិការផ្លូវដែក នៅខេត្តនេះ ត្រូវបានអនុញ្ញាតឲ្យចាប់ផ្តើមឡើងវិញជាបណ្តើរៗ ចាប់ពីម៉ោង ៨:៣០នាទីព្រឹក (ត្រូវនឹងម៉ោង ០០:៣០នាទី ម៉ោងសកល) នៅថ្ងៃសៅរ៍។

ដោយមានកម្លាំងខ្យល់បក់ជាង ២០០គីឡូម៉ែត្រ ក្នុងមួយម៉ោង ក្នុងនាមជាព្យុះទីហ្វុងធំជាងគេបំផុត Saola គឺជាព្យុះដ៏មានកម្លាំងខ្លាំងបំផុត ដែលគំរាមកំហែងដល់ខេត្តភាគខាងត្បូង ចាប់តាំងពីឆ្នាំ១៩៤៩ មក។ អាជ្ញាធរចិនបាននិយាយថា វាបានក្លាយជាព្យុះទីហ្វុងមានកម្លាំងខ្យល់បក់ដ៏ខ្លាំងមួយ ខណៈព្យុះនេះ បានបក់បោកមកដល់ដីគោក ក្នុងទីក្រុង Zhuhai ជាមួយនឹងកម្លាំងខ្យល់បក់យឺតៗប្រហែល ១៦០គីឡូម៉ែត្រក្នុងមួយម៉ោង៕