ការត្រៀមខ្លួនយ៉ាងពេញលេញ កំពុងត្រូវបានធ្វើឡើងនៅទូទាំងកោះតៃវ៉ាន់ នាថ្ងៃសៅរ៍ទី២ ខែកញ្ញានេះ ដោយព្យាករថា ព្យុះទីហ្វុង Haikui (ហៃគួយ) នឹងបោកបក់មកដល់ដីគោក នៅឆ្នេរភាគអាគ្នេយ៍ នាថ្ងៃបន្ទាប់។

ផ្លែក្រូច ត្រូវបានកសិករដឹកមកមុនពេលកំណត់ ដោយមានការបារម្ភថា ដំណាំទាំងនោះ នឹងត្រូវបំផ្លិចបំផ្លាញ ខណៈដែលទូកនេសាទ ត្រូវចតទុកនៅក្នុងកំពង់ផែ ជុំវិញកោះតៃវ៉ាន់ បន្ទាប់ពីការព្រមានពីការធ្វើដំណើរតាមសមុទ្រ ត្រូវបានចេញ កាលពីថ្ងៃសុក្រ (ទី១ ខែកញ្ញា) ហើយជាមួយគ្នានេះ អ្នកពន្លត់អគ្គិភ័យបានបិទតំបន់មានហានិភ័យ និងល្បាតកំពង់ផែនានា ក៏ដូចជាឆ្នេរសមុទ្រ ដើម្បីណែនាំដាស់តឿនឲ្យមនុស្សទាំងឡាយ នៅឆ្ងាយពីកន្លែងទាំងនោះ។

តែយ៉ាងណាក្ដី ព្យុះទីហ្វុង Haikui មានកម្លាំងខ្សោយជាងព្យុះ Saola ដែលបានបោកបក់មកដល់ដីគោក នៅភាគខាងត្បូងប្រទេសចិន នៅថ្ងៃតែមួយ។ ព្យុះនេះត្រូវបានគេព្យាករថា នឹងបក់បោកមកដល់ដីគោក នៅរសៀលថ្ងៃអាទិត្យ (ថ្ងៃទី៣ ខែកញ្ញា) ដោយនាំមកនូវភ្លៀងធ្លាក់ខ្លាំងពាសពេញកោះនេះ រហូតដល់ទៅសប្តាហ៍ក្រោយ។

ក្រុមហ៊ុនអាកាសចរណ៍ក្នុងស្រុកធំៗពីររបស់កោះតៃវ៉ាន់ បានលុបចោលជើងហោះហើរទាំងអស់ សម្រាប់ថ្ងៃអាទិត្យ ហើយរដ្ឋាភិបាល បានព្រមានប្រជាជនឲ្យនៅឆ្ងាយពីឆ្នេរសមុទ្រ និងតំបន់ភ្នំ៕