ស្វាយរៀង៖រដ្ឋាបាលខេត្តស្វាយរៀងបានប្រកាសពីការរកឃើញមនុស្ស ៣៣នាក់ទៀតបានឆ្លងមេរោគកូវីដ-១៩ដែលភាគច្រើនជាកម្មករកម្មការិនីរោងចក្រនៅតំបន់សេដ្ឋកិច្ចពិសេសសានតុង សាន់សែល ស្ថិតក្នុងក្រុងបាវិត។
ក្នុងសេចក្ដីជូនដំណឹងនៅថ្ងៃនេះ រដ្ឋបាលខេត្តស្វាយរៀង បានបញ្ជាក់ថា ករណីឆ្លងថ្មីទាំងនេះ ត្រូវបានរកឃើញលើកម្មការិនី ១៦នាក់ និងកម្មករ ៤នាក់ ដែលសុទ្ធតែបម្រើការងារនៅរោងចក្រយូលី ស្ថិតក្នុងតំបន់សេដ្ឋកិច្ចពិសេស នៅក្រុងបាវិត។
ចំណែកឯករណីឆ្លងថ្មី ១៣នាក់ទៀត រដ្ឋបាលខេត្តនេះបញ្ជាក់ថា បានរកឃើញលើប្រជាពលរដ្ឋ ១៣នាក់ផ្សេងទៀត ក្នុងនោះមានពលរដ្ឋខ្មែរម្នាក់ទើបវិលត្រឡប់មកពីប្រទេសកាលពីថ្ងៃចន្ទកន្លងមកនេះ។
បើតាមរដ្ឋបាលខេត្តស្វាយរៀង អ្នកជំងឺកូវីដ-១៩ដែលទើបរកឃើញនេះ ត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែកសាមគ្គីរំដួលចំនួន ៤នាក់ និងមន្ទីរពេទ្យបង្អែកស្វាយជ្រំចំនួន ៦នាក់ ហើយក្រៅពីនេះ ត្រូវបានដាក់ឱ្យសម្រាកព្យាបាលនៅមណ្ឌលព្យាបាលជំងឺកូវីដ-១៩បាវិត។
គិតត្រឹមថ្ងៃនេះ ខេត្តស្វាយរៀងបានរកឃើញមនុស្សសរុបដល់ទៅ ៥៨៣នាក់ហើយបានឆ្លងមេរោគកូវីដ-១៩ ក្នុងនោះអ្នកជំងឺកូវីដ-១៩ចំនួន ៥នាក់បានស្លាប់ អ្នកជំងឺកូវីដ-១៩ចំនួន ៣៦៩នាក់ បានជាសះស្បើយ ហើយអ្នកជំងឺចំនួន ២០៨នកា់ទៀត កំពុងស្ថិតក្រោមការព្យាបាលបន្ត៕អត្ថបទ ៖ សុធី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
