បន្ទាប់ពីអញ្ជើញជួបសំណេះសំណាល និងថ្លែង​អំណរគុណ​ជូន​ដល់​សមាជិក​បក្ស​ក្នុង​ឃុំ​ជំពូ​ព្រឹក្ស​រួច​មក នារសៀលថ្ងៃទី ០៣ ខែកញ្ញា ឆ្នាំ២០២៣ ដដែលនេះ ឯកឧត្តម ហ៊ុន ម៉ានី អនុប្រធានទី១ នៃ​ក្រុមការងារគណបក្សចុះជួយខេត្តកំពង់ស្ពឺ បានបន្តអញ្ជើញជួបសំណេះសំណាល និងថ្លែង​អំណរគុណ​ជូន​ដល់ក្រុមការងារ រចនាសម្ព័ន្ធគណៈកម្មាធិការគណបក្ស និងសមាជិក សមាជិកា​គណបក្ស​ប្រជាជនកម្ពុជា ក្នុងឃុំព្រៃក្រសាំង ស្រុកសាមគ្គីមុនីជ័យ ខេត្តកំពង់ស្ពឺ។

ថ្លែងនាឱកាសនោះ ឯកឧត្តម ហ៊ុន ម៉ានី បានកោតសរសើរ ថ្លែង​អំណរគុណ​ដល់​គណៈកម្មការ​ចុះ​ជួ​​យស្រុក-ឃុំ ក្រុមការងារ រួមទាំងសមាជិក សមាជិកាបក្សទាំងអស់ ដែលបានខិតខំប្រឹងប្រែង លះ​បង់កម្លាំងកាយចិត្តបំពេញភារកិច្ច ផ្ដល់ជំនឿចិត្តជូនគណបក្សប្រជាជនកម្ពុជា ដែលបាន​ចេញ​ទៅ​បោះឆ្នោតកាលពីថ្ងៃទី២៣ ខែកក្កដា ឆ្នាំ២០២៣ កន្លងទៅ។ ជាមួយគ្នានេះ ឯកឧត្តម​បាន​ចូល​រួម​អបអរសាទរជាមួយបងប្អូនប្រជាពលរដ្ឋ ចំពោះជ័យជម្នះដ៏​ត្រចេះ​ត្រចង់​នា​ឱកាស​នោះ​ផង​ដែរ​។

ឯកឧត្តម ហ៊ុន ម៉ានី បានលើកឡើងទៀតថា ជ័យជម្នះនេះ គឺជាជ័យជម្នះដ៏វិសេសវិសាល ហើយ​ក្នុ​ង​នាម​ជា​មន្រ្តីគណបក្សប្រជាជនកម្ពុជា គឺត្រូវបម្រើប្រជាជនឱ្យកាន់តែប្រសើរបន្ថែមទៀត។ ជាមួយ​នឹង​ការលើកឡើងនេះ ឯកឧត្តម គូសបញ្ជាក់ថា មិនថាក្នុង​រាជ​រដ្ឋាភិបាល​ឯកឧត្តម​មាន​តួនាទី​ណាក៏​ដោយ ឯកឧត្តមនៅតែជាមន្រ្តីគណបក្សប្រជាជនកម្ពុជា គឺនៅតែចូល​រួម​ជា​មួយ​សកម្មភាព​គណបក្ស ក្នុងការដោះស្រាយបញ្ហារបស់ប្រជាជន មិនថាពេលសប្បាយ ឬ លំបាក គឺ​នឹង​នៅ​ជាមួយប្រជាជនគ្រប់កាលៈទេសៈណាទាំងអស់។ 

ជាចុងក្រោយ ឯកឧត្តម ហ៊ុន ម៉ានី ក៏បានអំពាវនាវដល់បងប្អូនប្រជាពលរដ្ឋទាំងអស់ បន្ត​ការ​គាំទ្រ និងជឿជាក់លើគណបក្សប្រជាជនកម្ពុជា និងការដឹកនាំរបស់សម្តេចមហាបវរធិបតី ហ៊ុន ម៉ាណែត ក្នុងការបន្តបេសកកម្ម ដើម្បីធានាឱ្យបាននូវសន្តិភាព ស្ថេរភាព និង​ការ​អភិវឌ្ឍ​គ្រប់​វិស័យ​ជូនជាតិ មាតុភូមិ៕ អត្ថបទ រដ្ឋា