ភ្នំពេញ៖ ឯកឧត្ដមកិត្តិនីតិកោសលបណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញ បានចូលរួមសន្និសីទលើកទី៩ នៃសមាគមតុលាការធម្មនុញ្ញហ្វ្រង់កូហ្វូន ដើម្បីពិភាក្សាលើការដោះស្រាយវិវាទការបោះឆ្នោត និងការពិនិត្យធម្មនុញ្ញភាព។
ឯកឧត្តមបណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញនៃព្រះរាជាណាចក្រកម្ពុជា បានដឹកនាំសមាជិកក្រុមប្រឹក្សាធម្មនុញ្ញចូលរួមសន្និសីទប្រធានស្ថាប័ននៃសមាគមតុលាការធម្មនុញ្ញហ្វ្រង់កូហ្វូន (ACCF) លើកទី៩ ស្តីពីសហសេវិកភាព តាមរយៈប្រព័ន្ធវីដេអូខន់ហ្វេរិន។
សន្និសីទនេះ មានការចូលរួមពីសំណាក់ឯកឧត្តម លោកជំទាវ ជាប្រធានក្រុមប្រឹក្សាធម្មនុញ្ញ ប្រធាន តុលាការធម្មនុញ្ញ ប្រធានតុលាការកំពូល និងជាប្រធានស្ថាប័នប្រហាក់ប្រហែល ព្រមទាំងសមាជិកដៃគូនានា សរុបចំនួន ៩៣រូប រួមមាន៖ ប្រធានតុលាការកំពូលប្រទេសកាណាដា និងជាប្រធានសមាគមACCF, ប្រធានក្រុមប្រឹក្សាធម្មនុញ្ញបារាំង និងអគ្គនាយកកិច្ចការនយោបាយ និងអភិបាលកិច្ចប្រជាធិបតេយ្យនៃអង្គការអន្តរជាតិហ្វ្រង់កូហ្វូនី។
នាឱកាសនោះ ឯកឧត្តមបណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញ ត្រូវបានជូនកិត្តិយសអញ្ជើញធ្វើជាវាគ្មិនទី១ ក្នុងកិច្ចពិភាក្សាតុមូលទី១ ដើម្បីពិភាក្សាក្រោមប្រធានបទ “ការអនុវត្ត និង វិធីសាស្ត្រពិនិត្យពិភាក្សា។
ក្នុងកិច្ចពិភាក្សាតុមូលទី១នេះ ឯកឧត្ដមបណ្ឌិត អ៊ឹម ឈុនលឹម បានលើកយកប្រធានបទស្តីពី “លក្ខន្តិកៈនៃសហសេវិកភាព នៃការអនុវត្តនិងវិធីសាស្ត្រអនុវត្តការងារ នៅក្នុងពេលពិនិត្យ ពិភាក្សារបស់ក្រុមប្រឹក្សាធម្មនុញ្ញ នៃព្រះរាជាណាចក្រកម្ពុជា ចែកជូនដល់អង្គសន្និសីទ ដើម្បីសិក្សាស្វែងយល់អំពីបទពិសោធន៍ពិសេសរបស់ក្រុមប្រឹក្សាធម្មនុញ្ញកម្ពុជា នៅក្នុងការពិនិត្យពិភាក្សានិងវិធីសាស្ត្រអនុវត្តការងារជាក់ស្តែង។
សូមជម្រាបជូនថា នៅរៀងរាល់ចន្លោះបីឆ្នាំម្តងនៃមហាសន្និបាតសមាគមតុលាការធម្មនុញ្ញហ្វ្រង់កូហ្វូន ACCF សមាគមត្រូវរៀបចំសន្និសីទប្រធានស្ថាប័ន នៃសមាគមតុលាការធម្មនុញ្ញហ្វ្រង់កូហ្វូននេះ ខណៈឆ្នាំនេះ ដោយសារបញ្ហាការរីករាលដាលនៃមេរោគកូវីដ១៩ សមាគមតុលាការធម្មនុញ្ញ ហ្វ្រង់កូហ្វូន បានសម្រេចធ្វើការប្រជុំតាមរយៈប្រព័ន្ធវីដេអូដោយមានការចូលរួមពីគ្រប់សមាជិកភាពទាំងអស់នៃសមាគម។
សមាគមតុលាការធម្មនុញ្ញហ្វ្រង់កូហ្វូន (ACCF) គឺជាសមាគមដែលត្រូវបានប្តូរ ឈ្មោះនៅក្នុងឆ្នាំ២០១៩ ពីសមាគម ដែលបង្កើតឡើងក្នុងឆ្នាំ២០០៧ ក្រោមការផ្តួចផ្តើមគំនិតរបស់ក្រុមប្រឹក្សាធម្មនុញ្ញបារាំង ដើម្បីរឹតចំណងទាក់ទងក្នុងសមាជិកហ្វ្រង់កូហ្វូន។
សមាគម ACCF រហូតមកដល់ពេលនេះ មានសមាជិកជាក្រុមប្រឹក្សាធម្មនុញ្ញ តុលាការធម្មនុញ្ញ តុលាការកំពូល និងស្ថាប័នចំនួន ៤៨ប្រទេស មកពីទ្វីបអាហ្វ្រិច អាមេរិក អឺរ៉ុប និងអាស៊ី។ ដោយឡែកក្រុមប្រឹក្សាធម្មនុញ្ញកម្ពុជា គឺជាស្ថាប័នធម្មនុញ្ញតែមួយគត់ មកពីទ្វីបអាស៊ី ដែលក្លាយជាសមាជិកនៃសមាគម ACCF តាំងពីឆ្នាំ១៩៩៨ និងជាសមាជិកគណៈអចិន្ត្រៃយ៍ ចាប់ពីឆ្នាំ២០១២ រហូតដល់បច្ចុប្បន្ន៕ អត្ថបទ៖ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
