ភ្នំពេញ៖ ឯកឧត្តម សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធ នឹងជំងឺកូវីដ-19 ព្រឹកថ្ងៃទី២៦ ខែឧសភានេះ នាទីសី្តការក្រសួង បានទទួលអំណោយឧបករណ៍បរិក្ខារវេជ្ជសាស្ត្រ ពីឯកឧត្តម វូ គ័ងមិញ ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសង្គមនិយមវៀតណាម ប្រចាំព្រះរាជាណាចក្រកម្ពុជា។
ឯកឧត្តម សាស្ត្រាចារ្យ ម៉ម ប៊ុនហេង បានថ្លែងថា ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា ចំណងមិត្តភាពជាប្រពៃណីកម្ពុជា-វៀតណាម ត្រូវបានពង្រឹង និងពង្រីកឥតឈប់ឈរ ជាពិសេសក្នុងកាលៈទេសៈដ៏លំបាកនៃការរីករាលដាលនៃជំងឺកូវីដ-១៩ ភាគីមិត្តវៀតណាម បានផ្តល់ជំនួយឥតសំណងជូនក្រសួងសុខាភិបាល រួមមាន៖សម្ភារៈបរិក្ខារវេជ្ជសាស្ត្រមួយចំនួន គឺម៉ាស់វេជ្ជសាស្ត្របីស្រទាប់ អាវពាក់ការពារ ម៉ាស់វេជ្ជសាស្ត្របីស្រទាប់ប្រឆាំងបាក់តេរី និងតំណក់តូចៗ ឧបករណ៍ធ្វើតេស្តរកមេរោគ រួមទាំងកញ្ចប់តេស្ត ថវិកាចំនួន២០០.០០០ដុល្លារអាមេរិក(ម្ភៃម៉ឺន)។
នាថ្ងៃនេះជំនួយមនុស្សធម៌ដ៏ថ្លៃថ្លាថ្មីមួយទៀតរបស់រដ្ឋាភិបាល និងប្រជាជន នៃសាធារណរដ្ឋសង្គមនិយមវៀតណាម ជូនរាជរដ្ឋាភិបាល និងប្រជាជន នៃព្រះរាជាណាចក្រកម្ពុជា រួមមាន៖ ម៉ាស់ ចំនួន២លាន ម៉ាស់N95 ចំនួន១០ម៉ឺន ក្នុងចំណោម៣០០.០០០ និងម៉ាស៊ីនជំនួយដកដង្ហើមចំនួន៨០០គ្រឿង។
ឯកឧត្តម រដ្ឋមន្រី្ត ម៉ម ប៊ុនហេង បានបញ្ជាក់ទៀតថា ជំនួយមនុស្សធម៌ដ៏ថ្លៃថ្លានាថ្ងៃនេះ របស់រដ្ឋាភិបាល និងប្រជាជនវៀតណាម សបញ្ជាក់ពីចំណងមិត្តភាព សាមគ្គីភាពជាប្រពៃណី និងកិច្ចសហប្រតិបតិ្តការកម្ពុជា-វៀតណាម កាន់តែត្រូវបានពង្រឹង និងពង្រីកឥតឈប់ឈរ និងបានបញ្ជាក់កាន់តែច្បាស់អំពីដំណើរឈានទៅសម្រេចបានការកសាងសហគមន៍អាស៊ានតែមួយ និងសូមថ្លែងអំណរគុណយ៉ាងជ្រាលជ្រៅជូនចំពោះឯកឧត្តម ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសង្គមនិយមវៀតណាម ប្រចាំនៅកម្ពុជា ក៏ដូចជារដ្ឋាភិបាល និងប្រជាជនវៀតណាមដែលតែងតែឧបត្ថម្ភ គាំទ្រគ្នាទៅវិញទៅមក ជាពិសេសលើវិស័យសុខាភិបាល៕ អត្ថបទ៖ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
