ភ្នំពេញ ÷ ឯកឧត្តម ចាយ បូរិន រដ្ឋមន្រ្តីក្រសួងធម្មការ និងសាសនា លោកជំទាវ សូ ភត្រា នឹងលោកជំទាវ ករុណាសិរីសុវឌ្ឍិនី អគ្គមហាឧបាសិកាពុទ្ធសាសនូបត្ថម្ភក៍ លុយ គន្ធី ត្រូវជាម្តាយបង្កើតរបស់ឯកឧត្តមរដ្ឋមន្ត្រី ព្រមទាំងមន្រ្តីរាជការក្រោមឱវាទ បានអញ្ជើញប្រគេនភត្តសម្តេចសង្ឃ នឹងព្រះសង្ឃ ប្រមាណ២៣០ព្រះអង្គ នៅវត្តមុនីសុវណ្ណ (ហៅក្រៅវត្តចំពុះក្អែក) មានទីតាំងស្ថិតនៅសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ នាព្រឹកថ្ងៃទី០៤ ខែ កញ្ញា ឆ្នាំ២០២៣នេះ។

ពិធីប្រគេនចង្ហាន់សម្តេចសង្ឃ និងព្រះសង្ឃ នាឱកាសនេះ គឺក្នុងពេលដែលព្រះសង្ឃចូលព្រះវស្សា និងដើម្បីឧទ្ទិសព្រះមហាកុសល ជូនចំពោះឧកញ៉ា មហាសប្បុរសធម្មសិរីញាណ អគ្គមហាឧបាសកពុទ្ធសាសនូបត្ថម្ភក៍ ចាយ ស៊ាងអ៊ី ត្រូវជាលោកឪពុកបង្កើតរបស់ឯកឧត្តម ចាយ បូរិន និងញាតិការទាំង៧សន្តាន ដែលបានចែកឋានទៅកាន់ឋានបរលោកនឹងសូមដួងវិញាណក្ខ័ន្ធអ្នកទាំងអស់ឲ្យបានទៅកាន់សុគតិភពកុំបីឃ្លៀងឃ្លាតឡើយ។

នាឱកាសវិសេសវិសាលនៃពិធីប្រគេនភត្តនេះ មានការយាងនិមន្តដោយខ្ពង់ខ្ពស់ពីសំណាក់សម្តេចសង្ឃទាំង១០ របស់គណៈមហានិកាយ នៃព្រះរាជាណាចក្រកម្ពុជា រួមមាន ៖

១.សម្ដេចព្រះពោធិវ័ង្ស អំ លឹមហេង សម្តេចព្រះសង្ឃនាយករងទី១ នៃព្រះរាជាណាចក្រកម្ពុជា។

២. សម្តេចព្រះវនរ័ត ណយ ច្រឹក សម្តេចព្រះសង្ឃនាយករងទី២ នៃព្រះរាជាណាចក្រកម្ពុជា។

៣. សម្ដេចព្រះឧត្តមវង្សា មួង រ៉ា សម្ដេចព្រះសង្ឃនាយករងទី៣ នៃព្រះរាជាណាចក្រកម្ពុជា។

៤. សម្ដេចព្រះធម្មលិខិតបណ្ឌិត សៅរ៍ ច័ន្ទថុល្ល ឧត្តមប្រឹក្សាគណៈមហានិកាយ។

៥. សម្ដេចព្រះឧត្តមបញ្ញា ដូង ផង់ សមាជិកថេរសភាព្រះពុទ្ធសាសនា។

៦. សម្ដេចព្រះឧត្តមចរិយាបណ្ឌិត ឈឹង ប៊ុនឈា សមាជិកថេរសភាព្រះពុទ្ធសាសនា។

៧. សម្ដេចព្រះឧត្តមមុនី ជា សំអាង សមាជិកថេរសភាព្រះពុទ្ធសាសនា។

៨. សម្ដេចព្រះពុទ្ធជ័យមុនី ឃឹម សន ប្រធានលេខាធិការដ្ឋានគណៈសង្ឃនាយក។

៩. សម្ដេចព្រះសាក្យមុនី រ័ត្ន សារឿន សមាជិកថេរសភាព្រះពុទ្ធសាសនា។

១០.សម្តេចព្រះព្រហ្មរតនមុនី ពិន សែម សមាជិកថេរសភាព្រះពុទ្ធសាសនា ។

ក្នុងនោះឯកឧត្តម ចាយ បូរិន រដ្ឋមន្រ្តីក្រសួងធម្មការ និងសាសនា បានថ្លែងថា វិស័យព្រះពុទ្ធសាសនារីកចម្រើនទៅបានដោយសារតែប្រទេសជាតិមានសុខសន្តិភាពពេញលេញ និងមានការអភិវឌ្ឍលើគ្រប់វិស័យ ក្រោមការដឹកនាំរបស់ប្រមុខរាជរដ្ឋាភិបាល តែងតែបានខិតខំ ប្រឹងប្រែងគ្រប់ពេលវេលាសម្រាប់វឌ្ឍនៈភាពនៃប្រទេសកម្ពុជា ជាងនេះទៅទៀត វិស័យអាណាចក្រត្រូវបានរីកចម្រើនស្របគ្នាជាមួយវិស័យពុទ្ធចក្រ ដោយរាជរដ្ឋាភិបាលតែងតែបានយកចិត្តទុកដាក់ផ្តល់សិទ្ធសេរីភាពគ្រប់បែបយ៉ាងជូនប្រជាពលរដ្ឋ ពិសេសគឺការគោរពប្រតិបត្តិជំនឿសាសនារៀងៗខ្លួន។ ជាក់ស្តែងសមិទ្ធផលជាច្រើន ពិសេសការអភិវឌ្ឍទីវត្តអារាមក្នុងសុខសន្តិភាព បានបង្ហាញអំពី កិច្ចខិតខំ ប្រឹងប្រែងរបស់ ប្រមុខនៃរាជរដ្ឋាភិបាលក៏ដូចជាសមាជិកនៃរាជរដ្ឋាភិបាលកម្ពុជាផងដែរ៕ អត្ថបទ រដ្ឋា