ប្រធានាធិបតីទួរគី លោក Recep Tayyip Erdogan ត្រូវបានគេរំពឹងថា នឹងអំពាវនាវដល់សមភាគី រុស្ស៊ីរបស់លោក គឺលោក Vladimir Putin ដើម្បីឲ្យវិលត្រឡប់មករកកិច្ចព្រមព្រៀងដែលអនុញ្ញាតឲ្យអ៊ុយក្រែន ដឹកជញ្ចូនគ្រាប់ធញ្ញជាតិរបស់ខ្លួនតាមសមុទ្រខ្មៅ។ មេដឹកនាំទាំងពីរ ត្រូវបានកំណត់ពេលជួបគ្នាក្នុងទីក្រុង Sochi ប្រទេសរុស្ស៊ីភាគខាងត្បូងនៅថ្ងៃចន្ទនេះ។

កាលពីខែកក្កដា រុស្ស៊ីបាន បានដកខ្លួនចេញពីកិច្ចព្រមព្រៀងដែលបានសម្របសម្រួលដោយប្រទេសទួរគី និងអង្គការសហប្រជាជាតិ ដែលបង្កើនការព្រួយបារម្ភអំពីវិបត្តិស្បៀងអាហារសកល។ ទោះជាយ៉ាងណា វានៅតែពុំច្បាស់លាស់នោះទេថាតើជំនួបនេះនឹងត្រួសត្រាយផ្លូវសម្រាប់ការបន្តកិច្ចព្រមព្រៀងឬយ៉ាងណានោះទេ ខណៈកងកម្លាំងរុស្ស៊ីបានវាយប្រហារកំពង់ផែមួយនៅអ៊ុយក្រែនភាគខាងត្បូង ជាកន្លែងដែលហេដ្ឋារចនាសម្ព័ន្ធដឹកជញ្ចូនគ្រាប់ធញ្ញជាតិមានទីតាំងនៅទីនោះ។ ក្រសួងការពារជាតិរុស្ស៊ី បាននិយាយកាលពីថ្ងៃអាទិត្យថា ការវាយប្រហារដោយយានដ្រូនរបស់ខ្លួន បានដាក់គោលដៅលើទីតាំងស្តុកប្រេងនៅកំពង់ផែក្នុងតំបន់ Odesa។

ទន្ទឹមនឹងនេះ យោធាអ៊ុយក្រែន បាននិយាយថា កងទ័ពរបស់ខ្លួន បានបាញ់ទម្លាក់យានដ្រូនផលិតនៅអ៊ីរ៉ង់ចំនួន២២គ្រឿងក្នុងចំណោម២៥គ្រឿង។ ប៉ុន្តែបាននិយាយថា ហេដ្ឋារចនាសម្ព័ន្ធកំពង់ផែ នៅលើទន្លេ danube ត្រូវបានវាយប្រហារបណ្តាលឲ្យមានអគ្គិភ័យហើយមនុស្ស២នាក់រងរបួស។

ទន្លេ Danube បានបម្រើជាផ្លូវជម្រើសដ៏សំខាន់សម្រាប់អ៊ុយក្រែនដើម្បីនាំចេញផលិតផលកសិកម្មរបស់ខ្លួន ដោយសារតែការដកខ្លួនចេញរបស់រុស្ស៊ីពីកិច្ចព្រមព្រៀងគ្រាប់ធញ្ញជាតិ ដែលមានន័យថា កងកម្លាំងរបស់ខ្លួនអាចវាយប្រហារនាវាដែលឆ្លងកាត់តាមសមុទ្រខ្មៅ។