មេដឹកនាំអាស៊ីអាគ្នេយ៍ អាចរំពឹងថា នឹងមាននូវសប្តាហ៍ដ៏មមាញឹកមួយ ចាប់ពីថ្ងៃអង្គារ (ទី៥ ខែកញ្ញា) ស្អែកនេះ នៅពេលដែលថ្នាក់ដឹកនាំទាំងនោះ មកជួបជុំគ្នា សម្រាប់កិច្ចប្រជុំកំពូលប្រចាំឆ្នាំ នៅទីក្រុងហ្សារកាតា ប្រទេសឥណ្ឌូណេស៊ី ដើម្បីដោះស្រាយបញ្ហាប្រឈមនានា ដែលរួមមានទាំងវិបត្តិនៅសហភាពមីយ៉ាន់ម៉ា និងបន្ធូរបន្ថយភាពតានតឹង ជុំវិញផែនទីជាតិថ្មីរបស់ប្រទេសចិន ដែលអះអាងសិទ្ធិអធិបតេយ្យភាពលើតំបន់ជម្លោះ នៅសមុទ្រចិនខាងត្បូង។

កិច្ចប្រជុំកំពូលរបស់សមាគមប្រជាជាតិអាស៊ីអាគ្នេយ៍ (អាស៊ាន) លើកទី៤៣ ចាប់ពីថ្ងៃអង្គារ ដល់ថ្ងៃព្រហស្បតិ៍ និងធ្វើជាម្ចាស់ផ្ទះដោយប្រធានប្ដូរវេន គឺប្រទេសឥណ្ឌូនេស៊ី សន្យាថា នឹងផ្តល់ឲ្យមាននូវកិច្ចព្រមព្រៀងនានា ដែលក្នុងនោះរួមទាំងការអភិវឌ្ឍហេដ្ឋារចនាសម្ព័ន្ធបៃតង និងខ្សែចង្វាក់ផ្គត់ផ្គង់ធន់ សន្តិសុខស្បៀង ហើយនិងសេដ្ឋកិច្ចឌីជីថល និងការទូទាត់ប្រព័ន្ធអេកូ។

លោកប្រធានាធិបតីឥណ្ឌូនេស៊ី លោក Joko Widodo ត្រូវបានគេរំពឹងថា នឹងធ្វើជាប្រធានកិច្ចប្រជុំកំពូលចំនួន ១២ ក្នុងនោះរួមទាំងកិច្ចប្រជុំពេញអង្គ និងសម្ងាត់នៃកិច្ចប្រជុំកំពូលអាស៊ាន កិច្ចប្រជុំកំពូលអាស៊ីបូព៌ា និងកិច្ចប្រជុំកំពូលអាស៊ានបូកបី ព្រមទាំងកិច្ចប្រជុំទ្វេភាគីចំនួន១៣ ផងដែរ។ ឥណ្ឌូនេស៊ីកំពុងជំរុញឲ្យមានកិច្ចខិតខំប្រឹងប្រែង ដើម្បីពន្លឿនដំណើរការនៃការសម្រេច នៅក្នុងប្លុកនេះ ជាពិសេស ក្នុងគ្រាមានវិបត្តិ។ ជាគោលការណ៍មូលដ្ឋាន ការសម្រេចក្នុងប្លុកអាស៊ាន គឺផ្អែកលើការពិគ្រោះ និងការឯកភាព។

យ៉ាងហោចណាស់ រដ្ឋសមាជិកចំនួន៩ ក៏ដូចជាសមាជិកនាពេលអនាគតទីម័រខាងកើត ដែលនឹងត្រូវបានតំណាងដោយនាយករដ្ឋមន្ត្រី លោក Xanana Gusmao ( សាន់ណាណា ហ្គូស្មាវ) ត្រូវបានគេរំពឹងថា នឹងចូលរួមកិច្ចប្រជុំកំពូលនេះ។ របបយោធាដែលកំពុងកាន់អំណាចរបស់សហភាពមីយ៉ាន់ម៉ា នៅតែត្រូវបានហាមឃាត់ពីកិច្ចប្រជុំកំពូលអាស៊ានជាផ្លូវការ ហើយប្រហែលជាមិនបញ្ជូនឥស្សរជនមិនពាក់ព័ន្ធនយោបាយមកចូលរួម ដូចនៅក្នុងកិច្ចប្រជុំមុនៗនោះដែរ។ តំណាងកំពូលនៃដៃគូសន្ទនាចំនួន៩ របស់ប្លុកនេះ រួមមានអនុប្រធានាធិបតីសហរដ្ឋអាមេរិកលោកស្រី Kamala Harris និងនាយករដ្ឋមន្ត្រីចិនលោក Li Qiang ក៏នឹងចូលរួមផងដែរ៕