លោក Kleanthis Raptis គឺជាអ្នកគង្វាលសត្វពពែមួយរូប បានបាត់បង់សត្វចិញ្ចឹមរបស់លោកកាលពីថ្ងៃសៅរ៍ ក្រោយភ្លើងឆេះព្រៃសម្លាប់មនុស្សដែលបានឆាបឆេះអស់រយៈពេលជាង ២សប្តាហ៍មកហើយនោះ រីករាលដាលដល់ភូមិ Provatonas របស់គាត់ ស្ថិតនៅតំបន់ Evros ភាគឦសានប្រទេសក្រិក ។ 

លោក Raptis និយាយថា ពួកគេបានទូរស័ព្ទមកប្រាប់លោកថាវាឆេះអស់ហើយ ។ លោកបានធ្វើដំណើរមកដល់ ហើយជិតពាក់កណ្តាលនៃសត្វចិញ្ចឹមរបស់លោកបានងាប់អស់ដោយសារតែត្រូវភ្លើងឆេះ ។ រយៈពេល ៥ថ្ងៃមុន រឿងរ៉ាវតែមួយបានកើតឡើងម្តងទៀត ប៉ុន្តែពេលនោះ ពួកយើងអាចសង្រ្គោះជីវិតរបស់ពួកវា ។ កាលពីថ្ងៃម្សិលម្ងៃ សត្វពពែ វាបានងាប់អស់គ្មានសេសសល់អ្វីមួយក្បាល ។ 

លោកបន្តថា ពួកយើងត្រូវការជំនួយពីរដ្ឋ ដើម្បីជួយពួកយើង ។ ផ្តល់អ្វីខ្លះដល់ពួកយើង បើពុំដូច្នោះទេ ពួកយើងមិនដឹងជាត្រូវរស់តាមវិធីណានោះទេ ព្រោះសត្វចិញ្ចឹមរបស់ពួកយើងបានងាប់អស់គ្មានសល់ទៅហើយ ។

កាលពីឆ្នាំមុន ពេលដែលភ្លើងឆេះព្រៃមួយទៀត បានកើតឡើងនៅតំបន់ Evrosលោក Raptis អាចសង្រ្គោះជីវិតសត្វចិញ្ចឹមរបស់លោក ប៉ុន្តែភ្លើងឆេះព្រៃចុងក្រោយនេះ ធ្វើឲ្យលោកលែងនៅសស់អ្វីៗទៀតហើយ ។

កាលពីថ្ងៃអាទិត្យ យន្តហោះពន្លត់អគ្គិភ័យ និងក្រុមភ្នាក់ងារពន្លត់អគ្គិភ័យរាប់រយនាក់ បានព្យាយាមពន្លត់ភ្លើងឆេះព្រៃរយៈពេល ១៦ថ្ងៃជាប់ៗគ្នា ដើម្បីព្យាយាមទប់ស្កាត់ភ្លើងឆេះព្រៃនៅតំបន់ភាគឦសាន Evros គឺជាតំបន់ស្លាប់មនុស្សច្រើនបំផុតនៅអឺរ៉ុបក្នុងរដូវក្តៅនេះ ដោយបានសម្លាប់មនុស្សយ៉ាងហោច ២០នាក់ និងបំផ្លិចបំផ្លាញផ្ទះសម្បែងប្រជាពលរដ្ឋជាច្រើនខ្នង ៕