ការខ្វែងគំនិតគ្នាដែលមានមកយ៉ាងយូរ និងកាន់តែជ្រៅទៅៗ ជុំវិញបញ្ហាសង្គ្រាមរុស្ស៊ី នៅអ៊ុយក្រែន ធ្វើឲ្យបាត់បង់នូវវឌ្ឍនភាពលើបញ្ហានានា ដូចជាសន្តិសុខស្បៀង វិបត្តិបំណុល និងកិច្ចសហប្រតិបត្តិការពិភពលោកស្តីពីបម្រែបម្រួលអាកាសធាតុ នៅពេលដែលបណ្ដាប្រទេស ដែលអាចចាត់ទុកថា ជាមហាអំណាចធំៗបំផុតលើពិភពលោកចំនួន២០ ឬ G20 ជួបប្រជុំគ្នា នៅចុងសប្តាហ៍នេះ ក្នុងទីក្រុងញូវដេលី ប្រទេសឥណ្ឌា។

ជំហររឹងត្អឹងលើសង្រ្គាម បានរារាំងដល់ការឯកភាពសូម្បីតែសេចក្តីថ្លែងការណ៍តែមួយគត់ នៅឯកិច្ចប្រជុំថ្នាក់រដ្ឋមន្ត្រីចំនួន២០ ឬច្រើនជាងនេះរបស់ក្រុមប្រទេស G20 ក្នុងអំឡុងពេលដែលឥណ្ឌាជាអ្នកទទួលខុសត្រូវនៅឆ្នាំនេះ ដោយធ្វើឲ្យបណ្ដាមេដឹកនាំទាំងអស់ស្វែងរកផ្លូវដោះស្រាយ ប្រសិនបើអាចធ្វើទៅបាន។

ប៉ុន្តែប្រទេសចិន នឹងមាននាយករដ្ឋមន្ត្រី លោក Li Qiang ជាតំណាង មិនមែនប្រធានាធិបតី លោក Xi Jinping នោះទេ ខណៈពេលដែលរុស្ស៊ី បានបញ្ជាក់អះអាងពីអវត្តមានរបស់ប្រធានាធិបតី លោក Vladimir Putin ដោយលើកឡើងថា គ្មានប្រទេសណាមួយ ទំនងជាចូលរួមការឯកភាពណាមួយឡើយ។

នោះមានន័យថា កិច្ចប្រជុំកំពូលរយៈពេល ២ថ្ងៃ ចាប់ពីថ្ងៃទី៩ ខែកញ្ញាទៅ នឹងត្រូវគ្របដណ្ដប់ទៅដោយប្រទេសលោកខាងលិច និងសម្ព័ន្ធមិត្ត។ បណ្ដាមេដឹកនាំ G20 ដែលនឹងចូលរួមក្នុងកិច្ចប្រជុំនេះ រួមមានប្រធានាធិបតីអាមេរិក លោក Joe Biden អធិការបតីអាល្លឺម៉ង់ លោក Olaf Scholz ប្រធានាធិបតីបារាំង លោក Emmanuel Macron ព្រះអង្គម្ចាស់ Mohammed Bin Salman របស់ប្រទេសអារ៉ាប៊ីសាអ៊ូឌីត និងនាយករដ្ឋមន្ត្រីជប៉ុន លោក Fumio Kishida។

ពាក់ព័ន្ធនឹងជំនួបនៃមេដឹកនាំ G20 នេះ ក្រុមអ្នកវិភាគ បានសម្ដែងការយល់ឃើញថា កិច្ចប្រជុំកំពូល ដែលមិនចេញជាផ្លែផ្កាអ្វីនោះ នឹងបង្ហាញឲ្យឃើញពីដែនកំណត់នៃកិច្ចសហប្រតិបត្តិការ រវាងមហាអំណាចលោកខាងលិច និងមិនមែនលោកខាងលិច ហើយជំរុញឲ្យបណ្ដាប្រទេសទាំងនោះកានតែបន្ថែមការប្ដេជ្ញាចិត្តទៅលើក្រុមប្រទេសដែលខ្លួនមានភាពសុខដុមរមនាជាមួយ៕