ប្រធានាធិបតីអ៊ុយក្រែន លោក Volodymyr Zelenskiy បានស្នើលោក Rustem Umerov ដែលជាប្រធានទីភ្នាក់ងារឯកជនភាវូបនីយកម្មដ៏ធំរបស់អ៊ុយក្រែន ឲ្យធ្វើជារដ្ឋមន្ត្រីការពារជាតិ ក្នុងសម័យសង្គ្រាមរបស់ប្រទេសនេះ ដោយបេក្ខភាពរបស់លោក Umerov ត្រូវតែទទួលបានការអនុម័តពីសភាសិន មុនពេលរូបលោកត្រូវបានតែងតាំងក្នុងតួនាទីនេះ។

លោក Zelenskiy បាននិយាយកាលពីថ្ងៃអាទិត្យ (ទី៣ ខែកញ្ញា) ថា លោកបានសម្រេចបញ្ចប់តួនាទីរដ្ឋមន្ត្រីការពារជាតិរបស់លោក Oleksii Reznikov ហើយនឹងស្នើសុំសភា នៅថ្ងៃចន្ទ (ទី៤ ខែកញ្ញា) នេះ ឲ្យលោក Umerov មកកាន់តំណែងនេះជំនួស។ តើលោក Umerov ដែលនឹងជំនួសលោក Reznikov នោះ គឺជានរណា?

លោក Umerov ដែលទើបមានវ័យ ៤១ឆ្នាំ គឺជាជនជាតិតាតារ៍នៅតំបន់គ្រីម៉រ (Crimean Tatar) ពោលគឺក្រុមកុលសម្ព័ន្ធនិយាយភាសាទួរគីមកពីឧបទ្វីបអ៊ុយក្រែននៅសមុទ្រខ្មៅ ដែលត្រូវបានដណ្តើមគ្រប់គ្រងដោយប្រទេសរុស្ស៊ី ក្នុងឆ្នាំ២០១៤។ លោកកើតនៅទីក្រុង Samarkand នៅប្រទេសអ៊ូសបេគីស្ថាន ក្នុងគ្រួសារតាតរ៍គ្រីម៉េ ដែលត្រូវបាននិរទេសពីតំបន់គ្រីម៉េ ដែលនៅពេលនោះគ្រប់គ្រងដោយសហភាពសូវៀត ក្នុងទសវត្សរ៍ឆ្នាំ១៩៤០។ ចាប់តាំងពីឆ្នាំ២០២០ មក លោក Umerov ក្លាយជាសមាជិកនៃក្រុមការងាររបស់រដ្ឋាភិបាលអ៊ុយក្រែនដែលកំពុងធ្វើការលើយុទ្ធសាស្រ្ត ដើម្បីបញ្ចប់ការកាន់កាប់នៅតំបន់គ្រីម៉េ។

នៅខែកញ្ញា ឆ្នាំ២០២២ លោក Umerov ដែលជាអ្នកតំណាងរាស្រ្តមកពីគណបក្ស Holos ដែលគាំទ្រអឺរ៉ុប បានក្លាយជាប្រធានមូលនិធិអចលនទ្រព្យរដ្ឋ ដែលជាទីភ្នាក់ងារលក់ទ្រព្យសម្បត្តិរដ្ឋទៅឲ្យអ្នកវិនិយោគឯកជន។ ក្នុងតួនាទីរបស់លោក លោកត្រូវបានគេសរសើរ ក្នុងការបង្វែរស្ថាប័ន ដែលតែងតែជាប់គាំង នៅក្នុងរឿងអាស្រូវពុករលួយ។ លោកក៏បានចាប់ផ្ដើមបើកការលក់ទ្រព្យសម្បត្តិរដ្ឋឡើងវិញ ដោយបង្កើនចំណូលខ្ពស់បំផុតសម្រាប់រដ្ឋ ក្នុងសម័យសង្គ្រាមនេះ។

លោក Umerov បានចាប់ផ្តើមអាជីពរបស់លោក នៅក្នុងវិស័យឯកជន។ លោកបានចូលរួមជាមួយប្រតិបត្តិករទូរស័ព្ទចល័តឈានមុខគេរបស់អ៊ុយក្រែន ក្នុងឆ្នាំ២០០៤។ នៅឆ្នាំ២០១៣ លោកបានបង្កើតក្រុមហ៊ុនវិនិយោគផ្ទាល់ខ្លួន គឺ ASTEM និងមូលនិធិ ASTEM របស់ក្រុមហ៊ុន។ លោកមានបរិញ្ញាបត្រផ្នែកសេដ្ឋកិច្ច និងអនុបណ្ឌិតផ្នែកហិរញ្ញវត្ថុ៕