អាជ្ញាធរ បានឲ្យដឹងថា មនុស្ស ២នាក់ បានស្លាប់ និង ២នាក់ បានបាត់ខ្លួន ដោយសារភ្លៀងធ្លាក់យ៉ាងខ្លាំង បានបង្កជាទឹកជំនន់យ៉ាងធំ នៅភាគកណ្តាលនៃប្រទេសអេស្ប៉ាញ កាលពីថ្ងៃអាទិត្យ (ថ្ងៃទី៣ ខែកញ្ញា) និងព្រឹកថ្ងៃចន្ទ (ទី៤ ខែកញ្ញា) ដោយបានកាត់ផ្ដាច់ផ្លូវថ្នល់នានា ខ្សែរត់រថភ្លើងក្រោមដី និងការតភ្ជាប់រថភ្លើងល្បឿនលឿន។

ផ្លូវជាច្រើន នៅក្នុងតំបន់ម៉ាឌ្រីដ (Madrid) ត្រូវបានបិទ ខណៈដែលពាក់កណ្តាលនៃស្ពានជាច្រើន ត្រូវបានបាក់ ដោយសារទឹកឡើងខ្លាំងផុតច្រាំងទន្លេ។

សេវាសង្គ្រោះបន្ទាន់ បានឲ្យដឹងថា នៅក្នុងតំបន់ម៉ាឌ្រីដ សេវាសង្គ្រោះបន្ទាន់ បានដោះស្រាយឧបទ្ទវហេតុចំនួនជិត ១.២០០ ពេញមួយយប់ ហើយអ្នកពន្លត់អគ្គិភ័យ និងនគរបាល កំពុងស្វែងរកបុរសម្នាក់ នៅតំបន់ជនបទ Aldea del Fresno ភាគនិរតីនៃតំបន់ម៉ាឌ្រីដ។

ភ្លៀងធ្លាក់យ៉ាងខ្លាំងភ្លាមៗ បានប្រែក្លាយផ្លូវទៅជាទន្លេភក់ ដែលហូរទាញយកឡាន និងធុងសំរាមជាច្រើន នៅតំបន់ម៉ាឌ្រីដ តំបន់ Castile-La Mancha តំបន់ Catalonia និងតំបន់ Valencia។ ជាមួយគ្នានេះ ព្រឹលក៏ធ្លាក់នៅតំបន់ជាច្រើនផងដែរ។ អ្នកនាំពាក្យរបស់នគរបាល បាននិយាយថា មនុស្ស ២នាក់ បានស្លាប់ នៅក្នុងតំបន់ជនបទ ជុំវិញភាគកណ្ដាលទីក្រុង Toledo៕