ស៊ីហ្គេម៖ ឯកឧត្ដមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ត្រៃយ៍ នៃគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានធ្វើការក្រើនរំឭកដល់សហព័ន្ធកីឡាជាតិទាំងអស់ ត្រូវពង្រឹងស្មារតីត្រៀមចូលរួមប្រកួតកីឡាស៊ីហ្គេមនៅរដ្ឋធានីហាណូយនាខែវិច្ឆិកាខាងមុខ ដោយគ្មានមន្ទិលអ្វីឡើយ ដ្បិតម្ចាស់ផ្ទះវៀតណាមបានអះអាងប្រាប់ប្រទេសសមាជិកអាស៊ានថា ខ្លួននឹងរៀបចំព្រឹត្តិការណ៍ប្រចាំតំបន់នេះ ១០០% មិនមានបញ្ហាអ្វីឡើយ។
ការចង្អុលបង្ហាញរបស់ឯកឧត្ដមរដ្ឋមន្ត្រី ថោង ខុន បានធ្វើឡើងកិច្ចប្រជុំលក្ខណៈចង្អៀតរបស់គណៈអចិន្ត្រៃយ៍ CAMSOC កាលពីថ្ងៃទី២៥ ខែឧសភាម្សិលមិញ បន្ទាប់ពីទទួលបានព័ត៌មានពីភាគីម្ចាស់ផ្ទះវៀតណាមកាលពីថ្មីៗកន្លងទៅ។ កិច្ចប្រជុំនេះបានផ្ដោតលើប្រធានបទសំខាន់ៗ ២ គឺទី១-ស្ដីពីការត្រៀមប្រកួតកីឡាស៊ីហ្គេមនៅវៀតណាម និងទី២-ស្ដីពីការពិនិត្យរបាយការណ៍វឌ្ឍនភាពការងារ របស់គណៈកម្មការពិធីការរបស់ CAMSOC។ ក្រោយចប់កិច្ចប្រជុំនេះ ឯកឧត្ដម វ៉ាត់ ចំរើន អគ្គលេខាធិការ CAMSOC បានមានប្រសាសន៍ថា ដោយមានមន្ទិលថា វៀតណាមនឹងរៀបចំការប្រកួតកីឡាស៊ីហ្គេម ឬអត់ ស្របពេលវិបត្តិកូវីដ-១៩ ក្នុងតំបន់កំពុងមានការរីករាលដាលខ្លាំងបែបនេះ វៀតណាមបានអះអាងថានឹងរៀបចំធ្វើ ១០០%។ ឯកឧត្ដមបានជំរុញឲ្យសហព័ន្ធកីឡាជាតិ ត្រូវពង្រឹងស្មារតីត្រៀមខ្លួនឲ្យបានល្អ ដើម្បីសម្រេចគុណផលកីឡាកម្រិតខ្ពស់ឆ្ពោះទៅប្រជែងមេដាយក្នុងព្រឹត្តិការណ៍ ២ឆ្នាំម្ដងនេះ។
គួរបញ្ជាក់ថា ចំពោះការប្រកួតកីឡាស៊ីហ្គេមលើកទី៣១ នៅប្រទេសវៀតណាមគ្រោងប្រកួតពីថ្ងៃទី២១ ខែវិច្ឆិកាដល់ថ្ងៃទី២ ខែធ្នូ ឆ្នាំ២០២១ ខាងមុខ ដោយម្ចាស់ផ្ទះបានកំណត់កីឡាចំនួន ៤០ប្រភេទដាក់ឲ្យប្រកួត ក្នុងនោះកម្ពុជាក៏ត្រៀមបញ្ជូនអត្តពលិកចំនួន ៣២ប្រភេទកីឡាទៅចូលរួមផងដែរ។ ចំពោះការប្រកួតនេះដែរ ត្រូវបានកម្ពុជាចាត់ទុកជាព្រឹត្តិការណ៍ដ៏សំខាន់ ក្នុងផែនការយុទ្ធសាស្ត្រឆ្ពោះទៅស៊ីហ្គេមលើកទី៣២ ឆ្នាំ២០២៣ នៅកម្ពុជា។ ដូច្នេះអង្គភាពជំនាញបានទទូចឲ្យសហព័ន្ធកីឡាជាតិ និងគ្រប់ភាគីពាក់ព័ន្ធត្រូវពង្រឹងស្មារតីឲ្យបានខ្ពស់ ក្នុងការចូលរួមដកស្រង់បទពិសោធន៍ផង និងដណ្ដើមលទ្ធផលល្អផង មុនដល់វេនកម្ពុជាធ្វើម្ចាស់ផ្ទះព្រឹត្តិការណ៍ជាប្រវត្តិសាស្ត្រនេះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
