បាល់ទាត់៖ ទីបំផុតក្រុមការងារពារតំណែងជើងឯកបឹងកេត បានស្គាល់ជ័យជម្នះលើកដំបូង ក្នុងក្របខណ្ឌពានរង្វាន់មិត្តហ្វូនខេមបូឌានលីគឆ្នាំ២០២១ នេះហើយ បន្ទាប់ពីយកឈ្នះក្រុមម្ចាស់ផ្ទះសូលទីឡូអង្គរ ៣-០ ខណៈក្រុមវិសាខាបានយកឈ្នះក្រុមម្ចាស់ផ្ទះអគ្គិសនីកម្ពុជា ៧-០ កាលពីថ្ងៃទី២៦ ខែឧសភាម្សិលមិញ។
សម្រាប់ជំនួបបង្គ្រប់សប្ដាហ៍ទី៤ នៅកីឡដ្ឋាន SRU ខេត្តសៀមរាប គេឃើញលោក គីម ភក្ដី បានផ្ដល់ឱកាសដល់កីឡាករថ្មីៗជាច្រើន បង្ហាញខ្លួនក្នុងការប្រកួតជាមួយក្រុមបាតតារាងសូលទីឡូអង្គរ។ ចំពោះ ៣គ្រាប់ដែលជួយឲ្យក្រុមជើងឯក ៤សម័យទទួលបាន ៣ពិន្ទុដំបូងនេះគឺធ្វើសម្រេចដោយកីឡាករ ឱ ភារុណ នៅនាទីទី២, កីឡាករ Rajkovic Jarko នៅនាទី៧៧ និងកីឡាករ សៀង ចន្ធា នៅនាទី៨៤។ នេះគឺជាជ័យជម្នះលើកដំបូងរបស់ក្រុមនាគខៀវបឹងកេត បន្ទាប់ពីរងបរាជ័យ ៣ប្រកួតជាប់គ្នានៅដើមរដូវកាលថ្មី។ ប៉ុន្តែជ័យជម្នះនេះ ហាក់មិនអាចរំងាប់អារម្មណ៍របស់អ្នកគាំទ្រខ្លួនបានឡើយ ផ្ទុយទៅវិញមានអ្នកគាំទ្រមួយចំនួនបានសម្ដែងការមិនពេញចិត្ត ចំពោះការប្រើប្រាស់កីឡាករមិនសមបំណងពួកគេ ពីសំណាក់គ្រូបង្វឹកលោក គីម ភក្ដី ដ្បិតអ្នកខ្លះគិតថា បឹងកេតគួររកបានគ្រាប់បាល់ជ័យជម្នះច្រើនជាងនេះទើបសម។
ដោយឡែកក្រុមវិសាខាវិញបានបន្ដជ័យជម្នះ និងមិនឲ្យក្រុមអគ្គិសនីកម្ពុជាតដៃបានសូម្បីតែ ១គ្រាប់ជាលើកទី៦ ក្រោយយកឈ្នះ ៧-០ លើទឹកដីអគ្គិសនីកម្ពុជា។ សម្រាប់គ្រាប់បាល់ជ័យជម្នះ ៧គ្រាប់ក្នុងជំនួបបង្គ្រប់សប្ដាហ៍ទី៤ របស់ក្រុមភ្ញៀវវិសាខានេះ ធ្វើសម្រេចដោយកីឡាករ កែន ច័ន្ទសុភ័ក្ដ្រ ២គ្រាប់, Ajayi ២គ្រាប់ និង កែវ សុខផេង ២គ្រាប់ និងកំហុសខ្សែការពារអគ្គិសនីកម្ពុជាធ្វើឲ្យចូលទីខ្លួនឯងនៅនាទីទី២ ដែលនាំឲ្យវិសាខាឡើងទៅឈរលេខរៀងទី៥ ជាបណ្ដោះអាសន្ន និងមាន ៨ពិន្ទុបន្ទាប់ពីឆ្លងកាត់ ៤ប្រកួតឈ្នះ២ និងស្មើ២ មិនទាន់ស្គាល់ចាញ់នោះទេ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
