ចិន ៖ ដំណាំបានជន់លិចនៅក្នុងទឹកជំនន់ ហើយមនុស្សរាប់ម៉ឺននាក់ ត្រូវបានជម្លៀសចេញពីផ្ទះសម្បែងរបស់ខ្លួន ស្របពេលដែលព្យុះទីហ្វុង Haikuiបោកបក់ដល់ដីគោកនៅតំបន់ភាគអាគ្នេយ៍ប្រទេសចិន ។ នេះបើយោងតាមការចុះផ្សាយរបស់ទូរទស្សន៍រដ្ឋចិន CCTV នៅថ្ងៃអង្គារនេះ ។ 

មនុស្សប្រហែល ១១៤.៤០០នាក់ ត្រូវបានជម្លៀសចេញពីតំបន់រងហានិភ័យ ស្របពេលដែលព្យុះធ្វើដំណើរក្នុងល្បឿនខ្យល់បក់ ២០ម៉ែត្រ ក្នុង១វិនាទី ។ 

ទីភ្នាក់ងារឧតុនិយមជាតិចិន រាយការណ៍ថា ព្យុះទីហ្វុង Haikuiបានថមថយកម្លាំងរបស់វាវិញ ហើយនិងក្លាយជាព្យុះត្រូពិក ក្រោយបោកបក់ដល់ដីគោក កាលពីវេលាម៉ោង ៥ព្រឹក ថ្ងៃអង្គារនេះ ។ 

វាបានបោកបក់ឆ្លងកាត់ខេត្តភាគខាងត្បូងក្វាងទុង ហើយក្រុមព្យាករណ៍ឧតុនិយម រំពឹងថាវានឹងបន្តថមថយកម្លាំងបន្ថែមទៀត ។ 

ដោយឡែក ដងផ្លូវនៅទីក្រុងភាគអាគ្នេយ៍ហ៊្វូឈីងរបស់ចិន បានប្រែក្លាយជាទន្លេ ដោយសារភ្លៀងធ្លាក់ខ្លាំងបង្ក ឡើងដោយសារព្យុះ Haikui។រូបភាពវីដេអូឃ្លីបរបស់សាក្សី ឃើញចរន្តទឹកខ្លាំងហូរកាត់តាមផ្លូវជម្រាល ក្នុងនោះក្រុមអាជ្ញាធរក្នុងស្រុក រកឃើញភ្លៀងធ្លាក់កម្ពស់ ១៤៩មីលីម៉ែត្រ ក្នុងរយៈពេល ២៤ម៉ោងកន្លងមកនេះ ៕