អ៊ីរ៉ង ៖ ប្រទេសអ៊ីរ៉ង់ កាលពីថ្ងៃចន្ទ (ទី៤ ខែកញ្ញា) បានដាក់ការស្តីបន្ទោសទៅលើកំហុសឆ្គងរបស់ប្រទេសលោកខាងលិច ក្នុងការវាយតម្លៃលើបញ្ហាផ្ទៃក្នុង ក្នុងប្រទេសអ៊ីរ៉ង់ រហូតនាំទៅដល់ការបរាជ័យដែលមិនបានបញ្ចប់កិច្ចចរចាស្តីពីការស្ដារឡើងនូវកិច្ចព្រមព្រៀងនុយក្លេអ៊ែរឆ្នាំ២០១៥ ក្នុងខែកញ្ញាឆ្នាំមុន។

ទីភ្នាក់ងារសារព័ត៌មាននិស្សិតអ៊ីរ៉ង់ បានរាយការណ៍ថា នៅឯសន្និសីទសារព័ត៌មានមួយ ក្នុងរដ្ឋធានីតេអេរ៉ង់របស់អ៊ីរ៉ង់ អ្នកនាំពាក្យក្រសួងការបរទេសអ៊ីរ៉ង់ លោក Nasser Kanaani បាននិយាយថា ពង្រាងសេចក្តីសម្រេចចុងក្រោយនៃកិច្ចចរចា បានត្រៀមខ្លួនរួចរាល់ហើយ ក្នុងការបញ្ចប់ នៅខែកញ្ញា ឆ្នាំ២០២២ ដើម្បីរៀបចំមូលដ្ឋាន សម្រាប់ការវិលត្រឡប់របស់ភាគីទាំងអស់ចូលទៅក្នុងកិច្ចព្រមព្រៀងនេះវិញ។

តែទោះបីជាយ៉ាងណាក្ដី លោក Kanaani បាននិយាយថា សហរដ្ឋអាមេរិក និងដៃគូអឺរ៉ុបរបស់ខ្លួន មានការវាយតម្លៃខុស បន្ទាប់ពីកើតមានភាពចលាចល នៅប្រទេសអ៊ីរ៉ង់ ហើយប្រទេសទាំងនោះ បានជួយទំនុកបម្រុងដល់កុបកម្ម ដែលនាំឲ្យបាត់បង់ឱកាស ក្នុងការឈានដល់កិច្ចព្រមព្រៀងមួយ ដោយមានចេតនាពន្យារពេល និងបដិសេធមិនបញ្ចប់ការចរចា។

ជាមួយគ្នានេះ លោគបានបញ្ជាក់ថា ទោះបីជាមានការដាក់ទណ្ឌកម្មសេដ្ឋកិច្ចយ៉ាងតឹងរ៉ឹង ពីសំណាក់រដ្ឋអាមេរិកដាក់លើអ៊ីរ៉ង់ក៏ដោយ ក៏អ៊ីរ៉ង់បានដោះស្រាយ ដើម្បីរក្សាទីតាំងរបស់ខ្លួន នៅក្នុងទីផ្សារថាមពលតាមរយៈបណ្តាញផ្សេងៗ ដោយបន្ថែមថា ប្រទេសជាច្រើន បានបង្ហាញឆន្ទៈក្នុងការបង្កើនកិច្ចសហប្រតិបត្តិការជាមួយអ៊ីរ៉ង់។

សូមបញ្ជាក់ថា អ៊ីរ៉ង់បានចុះហត្ថលេខាលើកិច្ចព្រមព្រៀងនុយក្លេអ៊ែរ ដែលត្រូវបានគេស្គាល់ជាផ្លូវការថា ជាផែនការសកម្មភាពរូមគ្រប់ជ្រុងជ្រោយ (JCPOA) ជាមួយមហាអំណាចពិភពលោក កាលពីខែកក្កដា ឆ្នាំ២០១៥ ដោយយល់ព្រមដាក់ចេញនូវការទប់ស្កាត់មួយចំនួនលើកម្មវិធីនុយក្លេអ៊ែររបស់ខ្លួន ជាថ្នូរនឹងការដកទណ្ឌកម្មលើប្រទេសនេះ។ តែសហរដ្ឋអាមេរិក បានដកខ្លួនចេញពីកិច្ចព្រមព្រៀង កាលពីខែឧសភា ឆ្នាំ២០១៨ ហើយបានដាក់ទណ្ឌកម្មឯកតោភាគីរបស់ខ្លួនឡើងវិញលើទីក្រុងតេអេរ៉ង់ ដែលជំរុញឲ្យអ៊ីរ៉ងបន្ថយការប្តេជ្ញាចិត្តនុយក្លេអ៊ែរមួយចំនួនរបស់ខ្លួន ក្រោមកិច្ចព្រមព្រៀងនេះ។

កិច្ចពិភាក្សាស្តីពីការស្ដារកិច្ចព្រមព្រៀងJCPOA នោះឡើងវិញ បានចាប់ផ្តើមនៅក្នុងខែមេសា ឆ្នាំ២០២១ នៅទីក្រុងវីយ៉ែន ប្រទេសអូទ្រីស។ គ្មានភាពទ័លច្រកណាមួយ ត្រូវបានបំបែកនោះឡើយ បន្ទាប់ពីមានការចរចាចុងក្រោយបង្អស់ ក្នុងខែសីហា ឆ្នាំ២០២២៕