អាមេរិក ៖ សេតវិមានបាននិយាយ កាលពីថ្ងៃចន្ទ (ទី៤ ខែកញ្ញា) ថា ស្ត្រីទី១ របស់សហរដ្ឋអាមេរិក លោកស្រី Jill Biden បានធ្វើតេស្តវិជ្ជមានសម្រាប់ជំងឺកូវីដ-១៩ នៅប៉ុន្មានថ្ងៃមុនពេលលោកប្រធានាធិបតី Joe Biden ដែលបានធ្វើតេស្តអវិជ្ជមាន ចំពោះវីរុសនេះនោះ នឹងត្រូវធ្វើដំណើរទៅចូលរួមកិច្ចប្រជុំកំពូលក្រុមប្រទេសទាំង២០ ឬ G20 នៅប្រទេសឥណ្ឌា។

ភរិយាវ័យ ៧២ឆ្នាំរបស់លោក Biden ដែលមិនមានរោគសញ្ញាធ្ងន់ធ្ងរនោះ ចុងក្រោយ ឆ្លងជំងឺកូវីដ-១៩ នៅខែសីហាឆ្នាំមុន។ ចំណែកលោកប្រធានាធិបតីអាមេរិក ដែលឥឡូវនេះមានវ័យ ៨០ឆ្នាំ បានធ្វើតេស្តវិជ្ជមានលើកចុងក្រោយ កាលពីខែកក្កដា ឆ្នាំ២០២២។

នាយកផ្នែកទំនាក់ទំនងរបស់លោកស្រី Jill Biden គឺលោកស្រី Elizabeth Alexander បាននិយាយនៅក្នុងសេចក្តីថ្លែងការណ៍មួយថា៖ «ល្ងាចនេះ ស្ត្រីទី១ បានធ្វើតេស្តវិជ្ជមានជំងឺកូវីដ-១៩។ លោកស្រីនឹងបន្តសម្រាកនៅក្នុងគេហដ្ឋានរបស់លោកស្រី នៅឯទីក្រុង Rehoboth Beach ក្នុងទីក្រុង Delaware»។

សេតវិមានបានឲ្យដឹងថា៖ «បន្ទាប់ពីការធ្វើតេស្តវិជ្ជមានរបស់ស្ត្រីទី១ សម្រាប់ជំងឺកូវីដ-១៩ លោកប្រធានាធិបតី Biden ត្រូវបានអនុវត្តការតេស្តរកជំងឺកូវីដ-១៩ នៅល្ងាចនេះ។ លទ្ធផលរបស់លោកប្រធានាធិបតី គឺអវិជ្ជមាន។ តែលោកប្រធានាធិបតីនឹងត្រូវធ្វើតេស្តជាប្រចាំ ក្នុងសប្តាហ៍នេះ ហើយតាមដានរកមើលរោគសញ្ញា»។

តែយ៉ាងក្ដី សេតវិមានមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយថា តើការធ្វើដំណើរទៅក្រៅប្រទេសរបស់លោក Biden អាចមានការប៉ះពាល់ដែរ ឬយ៉ាងណា៕