ក្រសួងការបរទេសរបស់ប្រទេសគុយបា បានឲ្យដឹង កាលពីថ្ងៃចន្ទ (ទី៤ ខែកញ្ញា) ថា ប្រទេសគុយបា បានរកឃើញកន្លែងក្រុមជួញដូរមនុស្ស ដែលបង្ខិតបង្ខំពលរដ្ឋរបស់ខ្លួនឲ្យទៅជួយរុស្ស៊ីប្រយុទ្ធ ក្នុងសង្គ្រាម នៅអ៊ុយក្រែន ដោយបន្ថែមថា អាជ្ញាធរគុយបា កំពុងធ្វើការដើម្បី «បិទ និងកម្ទេច» បណ្តាញនេះចោលទាំងស្រុង។

សេចក្តីថ្លែងការណ៍របស់ក្រសួងការបរទេសគុយបា បានផ្តល់ព័ត៌មានលម្អិតមួយចំនួន ប៉ុន្តែបានកត់សម្គាល់ថា ក្រុមជួញដូរនេះ កំពុងដំណើរការទាំងនៅក្នុងប្រទេសកោះការ៉ាអ៊ីព ដែលមានចម្ងាយរាប់ពាន់គីឡូម៉ែត្រពីទីក្រុងម៉ូស្គូ និងនៅក្នុងប្រទេសរុស្ស៊ី។

សេចក្តីថ្លែងការណ៍របស់រដ្ឋាភិបាលគុយបា បានឲ្យដឹងថា៖ «ក្រសួងមហាផ្ទៃ កំពុងធ្វើការប្រឆាំងទប់ទល់ និងកម្ទេចបណ្តាញជួញដូរមនុស្សទាំងស្រុង ដែលបណ្ដាញនេះ មានប្រតិបត្តិការពីប្រទេសរុស្ស៊ី ដើម្បីដាក់បញ្ចូលពលរដ្ឋគុយបា ដែលរស់នៅទីនោះ និងសូម្បីតែខ្លះមានមកពីគុយបា ទៅក្នុងកងកម្លាំងយោធា ដែលចូលរួមក្នុងប្រតិបត្តិការសង្គ្រាម នៅអ៊ុយក្រែន»។

រដ្ឋាភិបាលរុស្ស៊ី មិនបានធ្វើអត្ថាធិប្បាយអ្វីនោះឡើយ ពាក់ព័ន្ធនឹងការចោទប្រកាន់នេះ។ កាលពីចុងខែឧសភា កាសែតរុស្ស៊ី នៅទីក្រុង Ryazan បានរាយការណ៍ថា ពលរដ្ឋគុយបាជាច្រើននាក់ បានចុះកិច្ចសន្យាជាមួយកងកម្លាំងប្រដាប់អាវុធរុស្ស៊ី ហើយត្រូវបានដឹកជញ្ជូនទៅអ៊ុយក្រែន ជាថ្នូរនឹងការទទួលបានសញ្ជាតិរុស្ស៊ី៕