ប្រធានមជ្ឈមណ្ឌលទទួលបន្ទុកធុរកិច្ចដ៏ធំបំផុតរបស់ប្រទេសជប៉ុន និយាយថា កិច្ចពិភាក្សាសេដ្ឋកិច្ចលើកដំបូងជាមួយប្រទេសចិន ក្នុងរយៈពេល ៤ឆ្នាំ នឹងមានសារៈសំខាន់បន្ថែមទៀត ដោយសារទំនាក់ទំនងង ដែលកំពុងជាប់គាំង រវាងប្រទេសទាំង២។

គណៈប្រតិភូនៃមេដឹកនាំធុរកិច្ចជប៉ុនគ្រោង នឹងធ្វើទស្សនកិច្ចនៅទីក្រុងប៉េកាំង ក្នុងខែមករា ហើយលោក Tokura Masakazu ប្រធានសហព័ន្ធធុរកិច្ចជប៉ុន បានប្រាប់ថា៖ «មានបញ្ហាលំបាក ដោយក្នុងនោះរួមទាំងបញ្ហាសន្តិសុខសេដ្ឋកិច្ចផងដែរ។ យើងចង់អំពាវនាវឲ្យមានកិច្ចសហប្រតិបត្តិការ ក្នុងការបង្កើតបរិយាកាសសេដ្ឋកិច្ចសេរី និងបើកចំហជាមួយគ្នា»។

ដំណើរទស្សនកិច្ចរបស់សមាគមសេដ្ឋកិច្ចជប៉ុន-ចិន នឹងក្លាយជាការជួបគ្នាលើកដំបូង គិតចាប់តាំងពីឆ្នាំ២០១៩។ នោះគឺនៅមុនពេលមានជំងឺរាតត្បាត បានបង្ខំឲ្យក្រុមធុរកិច្ចនេះសម្រេចផ្អាកការធ្វើដំណើរ។

លោក Tokura បានលើកឡើងពីការប្រឆាំងយ៉ាងខ្លាំងរបស់ប្រទេសចិន ចំពោះការបញ្ចេញទឹក ដែលត្រូវបានថ្វើប្រព្រឹត្តិកម្មរួចហើយ និងនៅសល់សារធាតុវិទ្យុសកម្មតិចតួចចេញពីរោងចក្រនុយក្លេអ៊ែរ Fukushima Daiichi ដោយលោកប្រាប់ថា ភាពចម្រូងចម្រាសនេះ ធ្វើឲ្យការជួបគ្នានេះមានភាពសារៈសំខាន់ជាងពេលណាៗទាំងអស់ ដែលតម្រូវឲ្យភាគីទាំង២ អង្គុយទល់មុខពិភាក្សាគ្នា៕