ក្រុមហ៊ុនបច្ចេកវិទ្យាយក្សរបស់ចិន Huawei បានប្រកាស កាលពីថ្ងៃចន្ទ (ទី៤ ខែកញ្ញា) អំពីការបើកមជ្ឈមណ្ឌលសេវាផ្ទុកទិន្នន័យ នៅទីក្រុងរីយ៉ាដ ដែលជារដ្ឋធានីរបស់អារ៉ាប៊ីសាអ៊ូឌីត ដោយនេះជាផ្នែកមួយនៃកិច្ចខិតខំប្រឹងប្រែងរបស់ក្រុមហ៊ុន ដើម្បីពង្រីកការផ្តល់សេវាអនឡាញរបស់ខ្លួន នៅមជ្ឈិមបូព៌ា។

ក្រុមហ៊ុន Huawei បានឲ្យដឹងនៅក្នុងសេចក្តីថ្លែងការណ៍មួយថា មជ្ឈមណ្ឌលថ្មីនេះ នឹងក្លាយជាមជ្ឈមណ្ឌលផ្ទុកទិន្នន័យស្នូល សម្រាប់សេវាកម្មផ្ទុកទិនន្ន័យរបស់ Huawei នៅមជ្ឈិមបូព៌ា អាស៊ីកណ្តាល និងអាហ្រ្វិក ដោយ «ផ្តល់ជូននូវសេវាកម្មផ្ទុកទិន្នន័យប្រកបដោយភាពច្នៃប្រឌិត ដែលអាចទុកចិត្តបាន សុវត្ថិភាព និងនិរន្តរភាព»។

សេចក្តីថ្លែងការណ៍ បានបន្ថែមថា មជ្ឈមណ្ឌលទិន្នន័យថ្មី នៅទីក្រុងរីយ៉ាដនេះ នឹងផ្តល់សេវាផ្ទុកទិន្នន័យជាច្រើន រួមទាំងហេដ្ឋារចនាសម្ព័ន្ធ មូលដ្ឋានទិន្នន័យ ទិន្នន័យធំ និងបញ្ញាសិប្បនិម្មិត។ល។

ដោយសរសើរដល់ក្រុមហ៊ុន Huawei ថាជា «ដៃគូដ៏គួរឲ្យមានមោទនភាព» របស់អារ៉ាប៊ីសាអ៊ូឌីត ក្នុងការវិវឌ្ឍបច្ចេកវិទ្យារបស់ខ្លួន ព្រះអង្គម្ចាស់ Haitham bin Abdul Rahman Al-Ohali អនុរដ្ឋមន្ត្រីក្រសួងទំនាក់ទំនង និងបច្ចេកវិទ្យាព័ត៌មានរបស់ប្រទេសអារ៉ាប៊ីសាអូឌីត បានមានបន្ទូលថា ក្រុមហ៊ុនបច្ចេកវិទ្យាយក្សរបស់ចិនមួយនេះ បាន និងកំពុងធ្វើការជាមួយក្រសួង អ្នកផ្តល់សេវាក្នុងស្រុក សហគ្រាស និងសាកលវិទ្យាល័យ ក្នុងកិច្ចខិតខំប្រឹងប្រែងរួមផ្សេងៗ ឆ្ពោះទៅរកការផ្លាស់ប្តូរផ្នែកឌីជីថល៕