ក្រុមមន្រ្តីនគរបាល កំពុងស្វែងរកមនុស្សបាត់ខ្លួន ក្រោយភ្លៀងធ្លាក់ខ្លាំងបំផុតបណ្តាលឲ្យកើតមានទឹកជំនន់ដ៏គំហក់នៅតំបន់ភាគកណ្តាលប្រទេសអេស្ប៉ាញ និងបានសម្លាប់មនុស្សយ៉ាងហោច ២នាក់ ។

ក្រុមអាជ្ញាធរនិយាយថា មនុស្ស ៣នាក់ ត្រូវបានគេរាយការណ៍បាត់ខ្លួន ហើយទឹកជំនន់ បានបិទផ្លូវជាតិ ផ្លូវក្រោមដី និងការតភ្ជាប់សេវាកម្មរថភ្លើងល្បឿនលឿន ។

សេវាកម្មសង្រ្គោះបន្ទាន់ និយាយថា ឧទ្ធម្ភាគចក្រត្រូវបានបញ្ជូនទៅសង្រ្គោះមនុស្សដែលស្វែងរកទីជម្រកនៅលើដំបូងផ្ទះរបស់ពួកគេ ស្ថិតក្នុងតំបន់ Toledo ដែលមានចម្ងាយប្រហែល ៥០គ.មភាគនិរតីទីក្រុង Madrid ។ 

គួរឲ្យដឹងថា ភ្លៀងធ្លាក់ខ្លាំងកាលពីថ្ងៃអាទិត្យរហូតដល់ថ្ងៃចន្ទ បានធ្វើឲ្យដងផ្លូវក្លាយជាទន្លេដែលហូរនាំយកទៅរថយន្ត និងធុងសំរាមនៅទីក្រុង Madrid, Castile-La Mancha, Catalonia និងទីក្រុង Valencia ។

ព្យុះទឹកកក បានកើតមានផងដែរ នៅតាមតំបន់ជាច្រើន ហើយមនុស្ស ២នាក់ បានស្លាប់នៅតំបន់ជនបទ ជុំវិញទីក្រុងភាគកណ្តាល Toledo ជាទីដែលសេវាកម្មឧតុនិយម AEMET បានចុះបញ្ជីភ្លៀងធ្លាក់ខ្លាំងបំផុត ៩០លីត្រក្នុង១ម៉ែត្រក្រឡាកាលពីថ្ងៃអាទិត្យ ។

នៅក្នុងទីក្រុង Madrid សេវាកម្មសង្រ្គោះបន្ទាន់ បានជួយសង្រ្គោះឧបទ្ទេវហេតុកើតឡើងពេលយប់ ជិត ១.២០០លើក ហើយក្រុមភ្នាក់ងារពន្លត់អគ្គិភ័យ និងក្រុមនគរបាល កំពុងរុករកបុរសម្នាក់ដែលបាត់ខ្លួននៅតំបន់ជាយក្រុង Aldea del Fresno ស្ថិតនៅភាគនិរតីទីក្រុង Madrid ។

ផ្លូវជាច្រើនខ្សែនៅក្នុងទីក្រុង Madrid ត្រូវបានបិទ ស្របពេលដែលស្ពានជាច្រើនកន្លែង ត្រូវបានកាត់ផ្តាច់ដោយសារទឹកទន្លេហូរប្រៀបច្រាំង ៕