លោកប្រធានាធិបតីឥណ្ឌូនេស៊ី លោក Joko Widodo ដែលធ្វើតួនាទីប្រធានសមាគមប្រជាជាតិអាស៊ីអាគ្នេយ៍ (អាស៊ាន) បច្ចុប្បន្ន បានលើកឡើងនៅថ្ងៃអង្គារ (ទី៥ ខែកញ្ញា) នេះ ថា ផែនការសន្តិភាពដែលបានព្រមព្រៀងដោយប្លុកនេះ នឹងនៅតែជាមគ្គុទ្ទេសក៍នាំផ្លូវទៅរកវិធីដោះស្រាយជម្លោះ ក្នុងសហភាពមីយ៉ាន់ម៉ា។

អាស៊ានបានហាមឃាត់មេដឹកនាំរបបយោធាមិនឲ្យចូលរួមកិច្ចប្រជុំជាន់ខ្ពស់របស់ខ្លួន ប៉ុន្តែការខ្វែងគំនិតគ្នា បានលេចឡើង ដោយប្រទេសឥណ្ឌូនេស៊ី ដែលព្យាយាមឲ្យមានការចូលរួមពីគ្រប់ភាគីទាំងអស់ ដើម្បីជំរុញផែនការសន្តិភាពអាស៊ាន ហើយប្រទេសថៃ កំពុងព្យាយាមឲ្យមានការប្រាស្រ័យទាក់ទងជាមួយមេដឹកនាំយោធាមីយ៉ាន់ម៉ា។

បើយោងតាមប្រភពមួយ នៅទីក្រុងហ្សាការតា និងមួយផ្សេងទៀត នៅក្នុងតំបន់ បានឲ្យដឹងថា នៅថ្ងៃអង្គារនេះ មេដឹកនាំអាស៊ាន បានឈានដល់ការស្របមតិគ្នាជាឯកច្ឆ័ន្ទលើការមិនអនុញ្ញាតឲ្យសហភាពមីយ៉ាន់ម៉ាធ្វើជាប្រធានប្លុកនេះ នៅឆ្នាំ២០២៦ ដូចដែលបានគ្រោងទុកពីដំបូង។

ផ្ទុយទៅវិញ លោកប្រធានាធិបតី លោក Ferdinand Marcos Jr. បាននិយាយក្នុងអំឡុងកិច្ចប្រជុំនេះថា ប្រទេសហ្វីលីពីនរបស់លោក នឹងធ្វើជាម្ចាស់ផ្ទះនៅឆ្នាំ២០២៦ ដែលជាការបំពេញតួនាទីលឿនជាងការគ្រោងទុក ១ឆ្នាំ។ នេះបើយោងតាមការអត្ថបទចម្លងផ្លូវការនៃការធ្វើអត្ថាធិប្បាយរបស់លោក Marcos Jr. ក្នុងអំឡុងជំនួបនោះ ៕