ប្រធានាធិបតី លោក Yoon Suk Yeol បាននិយាយនៅថ្ងៃអង្គារ៍នេះថា ប្រទេសកូរ៉េខាងត្បូង និងប្រទេសអាស៊ីអាគ្នេយ៍ ត្រូវតែរួមកម្លាំងគ្នា ដើម្បីឆ្លើយតបទៅនឹងការគំរាមកំហែងនុយក្លេអ៊ែររបស់កូរ៉េខាងជើង ខណៈទីក្រុងវ៉ាស៊ីនតោន បានព្រមានមេដឹកនាំទីក្រុងព្យុងយ៉ាង ដែលបានកំណត់ពេលធ្វើទស្សនកិច្ចដ៏កម្រទៅកាន់ប្រទេសរុស្ស៊ីសម្រាប់កិច្ចពិភាក្សាពីអាវុធ។

លោក Yoon នឹងជួបជាមួយសមភាគី មកពីសមាគមន៍ប្រជាជាតិអាស៊ីអាគ្នេយ៍ (ASEAN) នៅក្នុងរដ្ឋធានីហ្សាការតា ប្រទេសឥណ្ឌូនេស៊ី នៅថ្ងៃពុធ បន្ទាប់ពីកិច្ចប្រជុំកំពូលមេដឹកនាំរបស់ពួកគេ មុនការចូលរួមកិច្ចប្រជុំកំពូលអាស៊ីបូព៌ា១៨ប្រទេស នៅថ្ងៃបន្ទាប់ ដែលរុស្ស៊ីនឹងចូលរួមផងដែរ។ នៅក្នុងបទសម្ភាសន៍មួយ ជាមួយសារព័ត៌មាន ឥណ្ឌូនេស៊ី Kompas លោក Yoon បាននិយាយថា ការបាញ់មីស៊ីល របស់ប្រទេសកូរ៉េខាងជើង បានដាក់ការគំរាមដោយផ្ទាល់និងអត្ថិភាព មិនត្រឹមតែកូរ៉េខាងត្បូងប៉ុណ្ណោះទេប៉ុន្តែថែមទាំងសម្ព័ន្ធមិត្តអាស៊ីអាគ្នេយ៍ផងដែរ។ 

លោក Yoon និយាយថា ក្នុងពេលវេលាបែបនេះ សាធារណៈរដ្ឋកូរ៉េ និងអាស៊ាន ត្រូវតែរួមកម្លាំងគ្នាដើម្បីឆ្លើយតបយ៉ាងម៉ឺនម៉ាត់ និងសហការគ្នាយ៉ាងជិតស្និតលើការរំសាយអាវុធនុយតក្លេអ៊ែររបស់កូរ៉េខាងជើង។

សមាជិកអាស៊ាន និងប្រទេសកូរ៉េខាងត្បូង ត្រូវបានគេរំពឹងថា នឹងអនុម័តសេចក្តីថ្លែងការណ៍រួមស្តីពីកិច្ចសហប្រតិបត្តិការប្រចាំតំបន់ ដែលលោក Yoon និយាយថា នឹងគូសបញ្ជាក់ពីការជំរុញរបស់បណ្តាមេដឹកនំា សម្រាប់តំបន់ឥណ្ឌូ-ប៉ាស៊ីហ្វិក សេរី សន្តិភាពនិងវិបុលភាព។