ដោយថ្លែងទៅកាន់គណៈប្រតិភូ ដែលចូលរួមកិច្ចប្រជុំកំពូលស្តីពីអាកាសធាតុអាហ្រ្វិកលើកដំបូង ដែលរៀបចំឡើងនៅទីក្រុងណៃរ៉ូប៊ីរបស់ប្រទេសកេនយ៉ា អគ្គលេខាធិការអង្គការសហប្រជាជាតិ (UN) លោក Antonio Guterres នៅថ្ងៃអង្គារ (ទី៥ ខែកញ្ញា) នេះ បានប្រាប់ថា ប្រទេសអភិវឌ្ឍន៍ ត្រូវទទួលខុសត្រូវចំពោះតួនាទីរបស់ពួកខ្លួន ក្នុងការធ្វើឲ្យកើនឡើងកម្ដៅផែនដី ដែលបណ្តាលឲ្យមានវិបត្តិអាកាសធាតុ។

លោក Guterres បានផ្ដោតជាសំខាន់ ដោយអំពាវនាវឲ្យបញ្ចប់ការប្រើប្រាស់ឥន្ធនៈហ្វូស៊ីល ដែលត្រូវបានគេមើលឃើញថា ជាកត្តាជំរុញមានមានការឡើងកម្ដៅផែនដី ដែលនៅទ្វីបអាហ្រ្វិក បានបណ្តាលឲ្យមានទឹកជំនន់ គ្រោះរាំងស្ងួត និងបាតុភូតភ្លៀងធ្លាក់ខុសប្រក្រតី។ លោកអគ្គលេខាធិការ បានលើកឡើងថា ហេតុការណ៍នេះ បានបណ្តាលឲ្យមនុស្សរាប់ពាន់នាក់បាត់បង់ជីវិត នៅតំបន់អាហ្វ្រិក។

លោក Guterres បានបន្ថែមថា៖ «ហើយប្រទេសទាំងអស់ ក៏ត្រូវតែដំណើរការមូលនិធិ ដើម្បីទ្រទ្រង់ដល់ការបាត់បង់ និងការខូចខាត ដែលត្រូវបានស្នើឡើងនៅឯកិច្ចប្រជុំស្ដីពីអាកាសធាតុរបស់ COP28 នាឆ្នាំនេះផងដែរ»៕