​បាល់ទាត់៖ ​លោក Antonio Conte បានសំរេច​ចាកចេញ​ពី​តំណែង​អ្នកចាត់ការ Inter Milan ហើយ ៣សប្តាហ៍​ប៉ុណ្ណោះ​បន្ទាប់ពី​ដឹកនាំ​ក្រុម​ឈ្នះ​ជើងឯក​អ៊ីតាលី Serie A លើកដំបូង​ក្នុង​រយៈពេល ១១ឆ្នាំ​។​

​​បុរស​វ័យ ៥១ឆ្នាំ​រូបនេះ​បាន​ចំណាយពេល​នៅ​អ៊ីតាលី ២ឆ្នាំ និង​នៅសល់​កិច្ចសន្យា​មួយឆ្នាំ​ទៀត​ជាមួយ Inter​។​ ​នេះ​ជាការ​ចែកផ្លូវ​គ្នា​រវាង​លោក Conte ជាមួយ​ក្លិប​ដោយ​ព្រមព្រៀងគ្នា​។​ ​ដំណើររឿង​ស្តីពី​អនាគត​របស់លោក Antonio Conte ជាមួយ Inter Milan កើតឡើង​ជាច្រើន​ខែ​មកហើយ ​ពាក់ព័ន្ធ​ទៅនឹង​បញ្ហា​ហិរញ្ញវត្ថុ​របស់​ក្លិប បន្ទាប់ពី​ម្ចាស់​វិនិយោគ​ក្រុម​ចិន Suning កំពុង​ជួបនឹង​វិបត្តិ​ហិរញ្ញវត្ថុ​ធ្ងន់ធ្ងរ​ដោយសារ Covid-19​។​ ​ក្រោយ​ចប់​រដូវ​កាល​នេះ​បើតាម​ការបញ្ជាក់​របស់​នាយក​បច្ចេកទេស Javier Zanetti អោយដឹងថា ​ក្លិប​មាន​គំរោង​បញ្ចេញ​កីឡាករ​មួយចំនួន ដើម្បី​កាត់បន្ថយ​ចំណាយ​តាម​ដែល​អាចធ្វើ​ទៅបាន​។​

​​កាលពី​ខែកុម្ភៈ​កន្លងទៅ​ក្លិប​ Jiangsu FC ដែល​ស្ថិតក្រោម​ការវិនិយោគរ​បស់​ក្រុមហ៊ុន Suning ដែរនោះ​ក៏បាន​ប្រកាស​ក្ស័យធន​មួយ​ទៅហើយ ៣​ខែ​ប៉ុណ្ណោះ​បន្ទាប់ពី​ឈ្នះ​ជើងឯក​លី​គ​កំពូល​ចិន Chinese Super League​។​ ​អតីត​អ្នកចាត់ការ Juventus លោក Massimiliano Allegri និង​គ្រូបង្វឹក Lazio បច្ចុប្បន្ន​លោក Simone Inzaghi ​ត្រូវបាន​គេ​ដឹងថា ​មាន​ភាគច្រើន​ក្នុងការ​ជំនួស​តំណែង​នៅ Inter Milan៕

​អត្ថបទ​៖​នាង សុភា​វុ​ធ