អាមេរិក ៖ សារព័ត៌មាន The Hill រាយការណ៍ថា រដ្ឋមន្ត្រីក្រសួងពាណិជ្ជកម្មអាមេរិក លោកស្រី Gina Raimondo បានបញ្ជាក់ថា អាមេរិកនឹងមិននាំចេញបន្ទះឈីបសម្រាប់កុំព្យូទ័រដ៏ទំនើបរបស់ខ្លួនទៅកាន់ប្រទេសចិនទេ ដោយសារការព្រួយបារម្ភផ្នែកយោធា។ 

ក្នុងអំឡុងពេលធ្វើដំណើរទៅកាន់ទីក្រុងប៉េកាំងនាពេលថ្មីៗនេះ ស្របពេលមានកំណើនភាពតានតឹងរវាងសហរដ្ឋអាមេរិក និងចិន លោកស្រី Raimondo បានសង្កត់ធ្ងន់លើការប្តេជ្ញាចិត្តរបស់ប្រទេសនេះ ក្នុងការរឹតត្បិតសមត្ថភាពយោធារបស់ប្រទេសចិន។ លោកស្រីក៏បានបង្ហាញពីការវាយប្រហារតាមអ៊ីនធឺណិតដែលខ្លួនបានជួបប្រទះពីប្រភពចិនផងដែរ។

លោកស្រី Raimondo បាននិយាយថា «យើងកំពុងព្យាយាមបង្អាក់សមត្ថភាពយោធារបស់ពួកគេ។ ដូច្នេះប្រសិនបើពួកគេគិតបែបនោះ មានន័យថាយុទ្ធសាស្ត្ររបស់យើងកំពុងដំណើរការហើយ។ យើងនឹងមិនលក់បន្ទះឈីបរបស់អាមេរិកដែលទំនើបបំផុតទៅឱ្យប្រទេសចិន ដែលចង់បានបច្ចេកវិទ្យាទាំងនោះសម្រាប់សមត្ថភាពយោធារបស់ពួកគេនោះទេ»។

ដោយគូសបញ្ជាក់បន្ថែមអំពីចេតនាជាយុទ្ធសាស្ត្រ លោកស្រី Raimondo បានបញ្ជាក់ថា សហរដ្ឋអាមេរិកនឹងបដិសេធមិនផ្គត់ផ្គង់ប្រទេសចិននូវបន្ទះឈីបដ៏ទំនើបរបស់អាមេរិក ដែលចិនចង់បានសម្រាប់ការពង្រឹងអំណាចយោធារបស់ខ្លួនឡើយ។ ការសម្រេចនេះស្របទៅនឹងកិច្ចខិតខំប្រឹងប្រែងដែលកំពុងបន្តរបស់សហរដ្ឋអាមេរិក ក្នុងការរក្សាបាននូវគម្រោងយុទ្ធសាស្ត្រនៅក្នុងវិស័យបច្ចេកវិទ្យាសំខាន់ៗរបស់ខ្លួន៕