បារាំង ៖ រដ្ឋមន្ត្រីរដ្ឋាភិបាល បាននិយាយ កាលពីថ្ងៃអង្គារ (ទី៥ ខែកញ្ញា) ថា ថ្ងៃបើកបវេសនកាលដំបូងនៃឆ្នាំសិក្សា ២០២៣-២០២៤ សាលាបារាំងមួយចំនួន បានបញ្ជូនក្មេងស្រីជាច្រើននាក់ត្រឡប់ទៅលំនៅឋានរបស់ពួកគេវិញ ដោយសារក្មេងស្រីទាំងនោះបដិសេធមិនព្រមដោះសម្លៀកបំពាក់អាបាយ៉ារបស់ពួកគេ ពោលគឺជាសម្លៀកបំពាក់ទ្រវែងដែលគ្របតាំងពីស្មាដល់ជើងរបស់ពួកស្ត្រីម៉ូស្លីម។

លោក Gabriel Attal បានប្រាប់ទូរទស្សន៍ BFM ថា ដោយប្រឆាំងនឹងការហាមប្រាមលើការស្លៀកសម្លៀកបំពាក់ម៉ូស្លីម ក្មេងស្រីជិត ៣០០នាក់ បានបង្ហាញខ្លួន កាលពីព្រឹកថ្ងៃចន្ទ (ទី៤ ខែកញ្ញា) ជាមួយនឹងសម្លៀកបំពាក់អាបាយ៉ារបស់ពួកគេ។ លោកបាននិយាយថា ក្មេងស្រីទាំងនោះភាគច្រើន បានយល់ព្រមផ្លាស់អាវក្រៅចេញ ប៉ុន្តែ ៦៧នាក់ បានបដិសេធ ហើយត្រូវបានបញ្ជូនទៅផ្ទះវិញ។

សូមបញ្ជាក់ថា រដ្ឋាភិបាលបារាង បានប្រកាសកាលពីខែមុនថា ខ្លួនកំពុងហាមប្រាមការស្លៀកពាក់សម្លៀកបំពាក់អាបាយ៉ា នៅក្នុងសាលារៀន ដោយនិយាយថា ការស្លៀកពាក់នោះ បានបំពានច្បាប់ស្តីពីលទ្ធិសាសនា ក្នុងវិស័យអប់រំ ដែលបានឃើញរួចមកហើយពីការហាមឃាត់ ចំបោះស្បៃរុំក្បាលរបស់ស្ត្រីម៉ូស្លីម ដោយបម្រាមនោះ ផ្អែកលើហេតុផលដែលពួកគេបង្កើតឡើងថា ជាការបង្ហាញអំពីទំនាក់ទំនងសាសនា។ ការសម្រេចនេះ បានធ្វើឲ្យពួកអ្នកនយោបាយស្ដាំរីករាយ ប៉ុន្តែក្រុមឆ្វេងនិយម អះអាងថា ទង្វើនេះ តំណាងឲ្យប្រមាថមើលងាយដល់សេរីភាពជនស៊ីវិល៕