កាលពីថ្ងៃអង្គារម្សិលមិញ រដ្ឋមន្រ្តីការបរទេសជប៉ុន លោក Yoshimasa Hayashi បានបានអំពាវនាវឲ្យភាគីជម្លោះនៅក្នុងប្រទេសស៊ូដង់ ធ្វើការឆ្ពោះទៅរកការបទឈប់បាញ់បន្ទាន់ ហើយនិងបញ្ចប់ជម្លោះ ដែលបានសម្លាប់មនុស្សរាប់ពាន់នាក់ និងធ្វើឲ្យមនុស្សរាប់លាននាក់ផ្សេងទៀត រត់ភៀសខ្លួន ចាប់តាំងពីសង្រ្គាមផ្ទុះឡើងកាលពីខែមេសារហូតមក។

លោក Hayashi និយាយថា ពាក់ព័ន្ធនឹងស្ថានភាពនៅក្នុងប្រទេសស៊ូដង់ ជប៉ុនរួមគ្នាជាមួយអេហ្ស៊ីប និងប្រទេសដទៃទៀត នឹងបន្តអំពាវនាវដល់ភាគីពាក់ព័ន្ធនឹងជម្លោះ ឲ្យមានបទឈប់បាញ់បន្ទាន់ ហើយនិងការផ្លាស់ប្តូឆ្ពោះទៅរកការគ្រប់គ្រងស៊ីវិល។

 លោកបន្តថា ជប៉ុនមានការព្រួយបារម្ភខ្លាំងបំផុតចំពោះការធ្វើឲ្យស្ថានភាពមនុស្សធម៌កាន់តែធ្ងន់ធ្ងរទៅនៅក្នុងប្រទេសស៊ូដង់ ហើយជប៉ុននិងសន្យាផ្តល់ជំនួយតម្លៃប្រហែល ៩២លានដុល្លារដល់ប្រទេសស៊ូដង់ និងប្រទេសជិតខាងរបស់ពួកគេ។

 លោក Hayashi បញ្ជាក់ទៀតថា ពួកយើងមានការព្រួយបារម្ភផងដែរចំពោះភាពតានតឹងឡើងកម្តៅខ្លាំងរវាងអ៊ីស្រាអែល និងប៉ាឡេស្ទីន។

 កាលពីថ្ងៃចន្ទកន្លងទៅ ទីភ្នាក់ងារជនភៀសខ្លួនអង្គការសហប្រជាជាតិ(UN) បាននិយាយថា ពួកគេរំពឹងថា មនុស្សជាង ១,៨លាននាក់មកពីស៊ូដង់ នឹងធ្វើដំណើរទៅកាន់ប្រទេសជិតខាងចំនួន ៥ ប្រទេស នាដំណាច់ឆ្នាំនេះ ហើយពួកគេបានអំពាវនាវសុំជំនួយ ១ពាន់លានដុល្លារ ដើម្បីកាត់បន្ថយអត្រាស្លាប់ និងអត្រាឆ្លងជំងឺកើនឡើង។

 សូមបញ្ជាក់ថា មនុស្សជាង ១លាននាក់ បានចាកចេញពីប្រទេសស៊ូដង់រួចទៅហើយ ទៅកាន់ប្រទេសជិតខាង  ឆាដ អេហ្ស៊ីប អេត្យូពី ស៊ូដង់ខាងត្បូង និងសាធារណរដ្ឋអាហ្វ្រិកកណ្តាល៕