ភ្នំពេញ ៖ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអនុញ្ញាតឱ្យលោក SANUI Kazumasa ប្រធានតំណាងនៃទីភ្នាក់ងារសហប្រតិបតិ្តការអន្តរជាតិជប៉ុន (ហៅកាត់ JICA-ចៃកា) ប្រចាំប្រទេសកម្ពុជា ចូលជួបសម្តែងការគួរសម និងពិភាក្សាការងារ, នាទីស្តីការក្រសួងសុខាភិបាល នាព្រឹកថ្ងៃទី០៦ ខែកញ្ញា ឆ្នាំ២០២៣នេះ។

​ជាកិច្ចចាប់ផ្តើមឯកឧត្តមសាស្ត្រាចារ្យ ឈាង រ៉ា បានមានមតិស្វាគមន៍ និងថ្លែងអំណរគុណដល់អង្គការ JICA ដែលកន្លងមកតែងតែគាំទ្រក្រសួងសុខាភិបាល ក្នុងការកសាងប្រព័ន្ធថែទាំសុខភាព ដែលមានភាពធន់ និងរឹងមាំនៅកម្ពុជា តាមរយៈការផ្តល់ហិរញ្ញប្បទាន ក្រោមក្របខណ្ឌជំនួយសហប្រតិបត្តិការបច្ចេកទេស និងហិរញ្ញប្រទានឥតសំណង ដល់វិស័យសុខាភិបាល ដូចជាសាងសង់មូលដ្ឋានសុខាភិបាល និងផ្គត់ផ្គង់សម្ភារវេជ្ជសាស្ត្រ ការពង្រឹងសេវាសង្គ្រោះបន្ទាន់ផ្នែកសម្ភព និងការថែទាំទារកទើបកើត សុខភាពបន្តពូជ សុខភាពផ្លូវភេទ ការអភិវឌ្ឍធនធានមនុស្សសុខាភិបាលនាពេលកន្លងមក និងកំពុងជួយជាបន្ត ព្រមទាំងបានលើកឡើងនូវគម្រោងកម្ចីហិរញ្ញប្បទាន ការធ្វើឱ្យប្រសើរឡើងនូវមន្ទីរពេទ្យថ្នាក់តំបន់ ដើម្បីកាត់បន្ថយគម្លាតសេវាសុខភាពរវាងរាជធានី និងខេត្ត។

ឯកឧត្តមសាស្ត្រាចារ្យរដ្ឋមន្ត្រី ក៏បានជម្រាបជូនភាគី JICA អំពីផែនការអាទិភាពរបស់ក្រសួងសុខាភិបាល ក្នុងអាណត្តិទី៧ ដែលត្រូវចាប់ផ្តើមអនុវត្តន៍រួមមាន៖ ការពង្រឹងសេវាមណ្ឌលសុខភាព មន្ទីរពេទ្យបង្អែកស្រុក-ខេត្ត តាមរយៈការកែលម្អអគារ បំពាក់សម្ភារបរិក្ខារពេទ្យ ឱសថ និងការបណ្តុះបណ្តាលបុគ្គលិក ព្រមទាំងការប្រយុទ្ធ នឹងជំងឺមិនឆ្លង និងការពង្រឹងស្ថាប័ន។

ជាការឆ្លើយតបលោក SANUI Kazumasa ប្រធានតំណាងនៃទីភ្នាក់ងារសហប្រតិបតិ្តការអន្តរជាតិជប៉ុន (ហៅកាត់ JICA-ចៃកា) បានសម្តែងនៅការអបអរសាទរ និងជូនពរឯកឧត្តមសាស្ដ្រាចារ្យ ឈាង រ៉ា រដ្ឋមន្រ្តី ក្នុងឱកាសដែលឯកឧត្តម ទទួលបាននូវការទុកចិត្តពីរាជរដ្ឋាភិបាលអាណត្តិទី៧ តែងតាំងជារដ្ឋមន្ត្រីក្រសួងសុខាភិបាល ព្រមទាំងបានរាយការណ៍អំពីកិច្ចសហប្រតិបត្តិការ ដែលនឹងត្រូវអនុវត្តន៍នាពេលខាងមុខនេះ និងបានស្នើសុំអនុសាសន៍ណែនាំបន្ថែមពី ឯកឧត្តមសាស្ត្រាចារ្យរដ្ឋមន្ត្រី សម្រាប់កិច្ចសហប្រតិបត្តិការជាបន្តទៀត។ 

លោកប្រធានតំណាងនៃទីភ្នាក់ងារសហប្រតិបតិ្តការអន្តរជាតិជប៉ុន បានសន្យានឹងបន្តពង្រឹង និងពង្រីកកិច្ចសហប្រតិបត្តិការ គាំទ្រផែនការអាទិភាពរបស់ក្រសួងសុខាភិបាល ព្រមទាំងជម្រុញការអនុម័តគម្រោងហិរញ្ញប្បទានអភិវឌ្ឍន៍មន្ទីរពេទ្យតំបន់ដែលបានគាំទ្រដោយរាជរដ្ឋាភិបាលរួចមកហើយ។

នាឱកាសនោះឯកឧត្តមសាស្ត្រាចារ្យ រដ្ឋមន្ត្រី បានថ្លែងអំណរគុណដល់អង្គការ JICA ជាពិសេស លោក SANUI Kazumasa ប្រធានតំណាងនៃទីភ្នាក់ងារសហប្រតិបតិ្តការអន្តរជាតិជប៉ុន ដែលបានបញ្ជាក់ជំហរបន្តគាំទ្រ រួមចំណែកជាមួយនឹងកិច្ចខិតខំប្រឹងប្រែងរបស់ក្រសួងសុខាភិបាល នៃព្រះរាជាណាចក្រកម្ពុជា ក្នុងការលើកកម្ពស់សុខុមាលភាពរបស់ប្រជាជនកម្ពុជា ដើម្បីឈានទៅសម្រេចបាននូវការគ្របដណ្តប់សុខភាពជាសកល ស្របតាមផែនការយុទ្ធសាស្រ្តបញ្ចកោណ នៃរាជរដ្ឋាភិបាលអាណត្តិទី៧ ក្រោមការដឹកនាំដ៏ឈ្លាសវៃ និងប៉ិនប្រសប់ប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕ អត្ថបទ រដ្ឋា​