ត្បូងឃ្មុំ ៖ ក្រោយពីបុរសម្នាក់ ដែលមានជំងឺកូវីដ-១៩ និងញៀនថ្នាំ បានវាយសម្លាប់មន្ត្រីយោធាម្នាក់ ដែលជាអ្នកយាមមន្ទីរពេទ្យបង្អែកស្រុកពញាក្រែក អ្នកជំងឺមួយចំនួននៅក្នុងមន្ទីរពេទ្យនេះ ធ្វើតេស្តរកសារធាតុញៀន ប៉ុន្តែអវិជ្ជមាន ខណៈសន្តិសុខ ត្រូវបានរឹតបន្តឹង។
លោកស្រីវេជ្ជបណ្ឌិត ហុង កុសល ប្រធានមន្ទីរពេទ្យបង្អែកស្រុកពញាក្រែក ក្នុងខេត្តត្បូងឃ្មុំ បានប្រាប់BTVនៅថ្ងៃនេះថា បន្ទាប់ពីមានករណីអ្នកជំងឺកូវីដ-១៩ញៀនថ្នាំ បានវាយសម្លាប់មន្ត្រីយោធា ដែល ជាអ្នកយាមមន្ទីរពេទ្យ កាលពីថ្ងៃទី២៥ ខែឧសភានេះមក ចំពោះអ្នកដែលមានវិជ្ជមានកូវីដ-១៩ កំពុងសម្រាកព្យាបាលនៅមន្ទីរបង្អែកនេះទាំងអស់ ត្រូវបានធ្វើតេស្តរកសារធាតុញៀន ហើយក្រុមគ្រូពេទ្យ នឹងសហការជាមួយកងកម្លាំងសមត្ថកិច្ច ដើម្បីរឹតបន្តឹងការយាមកាមបន្ថែមទៀត ដោយមានបំពាក់កាមេរ៉ាសុវត្ថិភាពនៅតាមបន្ទប់នីមួយៗ និងបន្ថែមកងកម្លាំងសមត្ថកិច្ចចំនួន៤ ទៅ៥នាក់ទៀត នៅកន្លែងមណ្ឌលចត្តាឡីស័ក និងមណ្ឌលពិនិត្យព្យាបាលជំងឺកូវីដ-១៩។
កាលពីល្ងាចថ្ងៃទី២៥ ខែឧសភា នេះ បុរសម្នាក់ ដែលវិជ្ជមានកូវីដ-១៩ និងញៀនថ្នាំផងនោះ បានធ្វើសកម្មភាពវាយសម្លាប់មន្ត្រីយោធាផ្នែកសឹករងស្រុកពញាក្រែក ដែលត្រូវបានអង្គភាពបញ្ជូនទៅយាមនៅមន្ទីរពេទ្យបង្អែកស្រុកពញាក្រែក។ ក្រោយកើតហេតុ បុរសនេះ ត្រូវបានឃាត់ខ្លួន និងបញ្ជូនទៅដាក់ក្នុងបន្ទប់ដាច់ដោយឡែក ដើម្បីព្យាបាលជំងឺកូវីដ-១៩ និងបន្សាបគ្រឿងញៀន បន្ទាប់មកទៀត នឹងបញ្ជូនទៅតុលាការ ដើម្បីចាត់ការតាមនីតិវិធីច្បាប់៕
អត្ថបទ៖ ថុង សីហា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
