អ៊ុយក្រែន បានបញ្ជាក់ជាថ្មីពីការចោទប្រកាន់របស់ខ្លួន ដែលថា រុស្ស៊ីបានបង្កឲ្យបាក់ទំនប់ទឹក Kakhovka នៅតំបន់ Kherson ភាគខាងត្បូងអ៊ុយក្រែន កាលពីខែមិថុនា។

ថ្ងៃពុធ(ទី៦ ខែកញ្ញា) នេះ ជាថ្ងៃគម្រប់រយៈពេល ៣ខែ គិតចាប់តាំងពីការបាក់ ដែលបានធ្វើឲ្យមានទឹកជំនន់ជន់លិចតំបន់ដ៏ធំល្វឹងល្វើយ។ រដ្ឋាភិបាលអ៊ុយក្រែន បានធ្វើសន្និសីទសារព័ត៌មានមួយ ក្នុងរដ្ឋធានីគីវរបស់ខ្លួន កាលពីថ្ងៃអង្គារ (ទី៥ ខែកញ្ញា)។ មន្ត្រីពីក្រសួងការពារជាតិ បាននិយាយថា ការវាយប្រហាររបស់រុស្សីទៅលើទំនប់នេះ ត្រូវទទួលបានស្តីបន្ទោស ចំពោះការបង្កឲ្យមានការបាក់នេះ។

ជាមួយគ្នានេះ មន្ត្រីរូបនេះ បាននិយាយថា ការស៊ើបអង្កេត បានរកឃើញថា ចម្ងាយ ៦០០គីឡូម៉ែត្រការ៉េ ឬតំបន់ធំជាងនេះ ត្រូវបានជន់លិច ហើយបានប្រាប់ថា យ៉ាងហោចណាស់មនុស្ស ៣២នាក់ បានស្លាប់ និង ៣៩នាក់ផ្សេងទៀត នៅតែស្ថិតក្នុងបញ្ជីថា កំពុងបាត់ខ្លួន។

លើសពីនេះទៀត មន្ត្រីដដែល បានប្រាប់ថា អាជ្ញាធរបានដោះគ្រាប់មីនជាង ៩០គ្រាប់ ដែលសណ្ដកដោយសារទឹកជំនន់ ប៉ុន្តែបានបញ្ជាក់បន្ថែមថា ត្រូវការពេលវេលាបន្ថែមទៀត ដើម្បីកម្ចាត់មីនទាំងនោះឲ្យអស់ទាំងស្រុង៕