មីយ៉ាន់ម៉ា ៖ ការកើនឡើងភាពតានតឹងសកល និងវិបត្តិសហភាពមីយ៉ាន់ម៉ា ដែលនៅបន្តត្រូវបានផ្តោតលើ នៅក្នុងកិច្ចប្រជុំកំពូលអាស៊ីបូព៌ានៅថ្ងៃព្រហស្បតិ៍នេះ អំឡុងថ្ងៃចុងក្រោយនៃកិច្ចប្រជុំកំពូលរបស់សមាគមប្រជាជាតិអាស៊ីអាគ្នេយ៍ក្នុងទីក្រុងហ្សាកាតា។ 

ថ្លែងនៅក្នុងពិធីបើកវេទិកាអាស៊ីបូព៌ា ប្រធានាធិបតីឥណ្ឌូនេស៊ី លោក Joko Widodo បានជំរុញឲ្យមេដឹកនាំទាំងអស់កាត់បន្ថយភាពតានតឹង និងមិនបង្កើតជម្លោះ ឬសង្គ្រាមថ្មីនោះទេ។ 

ប្រធានាធិបតីប្រទេសបង់ក្លាដែស លោក Mohammad Shahabuddin ដែលមានវត្តមាននៅក្នុងកិច្ចប្រជុំ បានអំពាវនាវដល់សហគន៍អន្តរជាតិស្វែងរកដំណោះស្រាយស្ថិតស្ថេរចំពោះជម្លោះនៅមីយ៉ាន់ម៉ា ដែលបានជំរុញឲ្យជនភៀសខ្លួនរ៉ូហីងយ៉ារាប់ពាន់នាក់ ចូលមកក្នុងប្រទេសរបស់លោក។ 

លោក Shahabuddin បាននិយាយថា ការពន្យារពេលការធ្វើមាតុភូមិនិវត្តន៍ជនភៀសខ្លួន និងកង្វះការគាំទ្រមនុស្សធម៌ អាចដាក់តំបន់ទាំងមូលស្ថិតក្នុងហានីភ័យ។ 

នៅក្នុងសេចក្តីថ្លែងការណ៍មួយកាលពីថ្ងៃពុធ អាស៊ានដែលឥណ្ឌូនេស៊ីធ្វើជាប្រធាន បាននិយាយថាមេដឹកនាំប្រចាំតំបន់ បានសម្តែងការព្រួយបារម្ភខ្លាំង ជុំវិញកង្វះភាពរីកចម្រើនរឹងមាំ លើផែនការសន្តិភាព៥ចំណុចសម្រាប់សហភាពមីយ៉ាន់ម៉ា។