តៃវ៉ាន់ ៖ មនុស្សមួយក្រុមនៅក្នុងកោះតៃវ៉ាន់របស់ប្រទេសចិន បានប្រមូលផ្តុំគ្នាកាលពីថ្ងៃពុធ (៦ កញ្ញា) ដើម្បីតវ៉ាប្រឆាំងនឹងការឃុបឃិតរបស់ក្រុមអាជ្ញាធរគណបក្សប្រជាធិបតេយ្យជឿនលឿន (DPP) ជាមួយបណ្ដាអ្នកនយោបាយជប៉ុន ដោយទាមទារឱ្យអាជ្ញាធរគណបក្ស DPP នេះ ហាមឃាត់ការនាំចូលអាហារ និងផលិតផលនេសាទ ដែលមានមេរោគនុយក្លេអ៊ែរពីប្រទេសជប៉ុន។

ក្រុមបាតុករ ដែលរួមមានបណ្ដាគណបក្សនយោបាយ និងអង្គការជាច្រើន បានចង្អុលបង្ហាញថា អាជ្ញាធរគណបក្ស DPP មិនដែលតវ៉ាប្រឆាំងនឹងផែនការបញ្ចេញទឹកកខ្វក់នុយក្លេអ៊ែររបស់រដ្ឋាភិបាលជប៉ុនទេ ដែលមិនត្រឹមតែជាការក្បត់យុត្តិធម៌ប៉ុណ្ណោះទេ ប៉ុន្តែថែមទាំងបានលះបង់សុខភាពប្រជាជនកោះតៃវ៉ាន់សម្រាប់ផលប្រយោជន៍នយោបាយអាត្មានិយមរបស់ពួកគេផងដែរ។

ក្រុមអ្នកតវ៉ាទាំងនោះបាននិយាយថា រដ្ឋាភិបាលជប៉ុនមិនអើពើនឹងការសង្ស័យ និងការជំទាស់យ៉ាងខ្លាំងរបស់សហគមន៍អន្តរជាតិ ព្រមទាំងប្រទេសជិតខាងរបស់ខ្លួន ហើយបានចាប់ផ្តើមជាឯកតោភាគីក្នុងការបញ្ចេញទឹកកខ្វក់នុយក្លេអ៊ែរ ហ្វ៊ូគូស៊ីម៉ា ទៅក្នុងមហាសមុទ្រ ដែលជាទង្វើដ៏ហួសចិត្តមួយមិនអើពើនឹងការរំលោភសិទ្ធិមនុស្សរបស់ខ្លួន។

ប្រទេសជប៉ុន បានចាប់ផ្តើមបញ្ចេញសំណល់ទឹកបំពុលដោយនុយក្លេអ៊ែរ ចេញពីរោងចក្រថាមពលនុយក្លេអ៊ែរ ហ្វ៊គូស៊ីម៉ា ដៃអ៊ីឈី ដែលខូចចូលទៅក្នុងមហាសមុទ្រប៉ាស៊ីហ្វិកកាលពីថ្ងៃទី២៤ ខែសីហា បើទោះបីជាមានការប្រឆាំងយ៉ាងខ្លាំងក្លាពីក្នុងប្រទេស និងក្រៅប្រទេសក៏ដោយ៕