ក្រុមអ្នកស្រាវជ្រាវកូរ៉េខាងត្បូង បានបង្កើតអាកាសយានិកយន្តដូចមនុស្សបេះបិទដ៏ទំនើបឈ្មោះ ‘PIBOT’ដែលអាចយល់ពីហត្ថកម្មជើងហោះហើរ និងប្រតិបត្តិការដំណើរការពេញរបស់ជើងហោះហើរដោយប្រើប្រាស់បច្ចេកវិទ្យាបញ្ញាសិប្បនិម្មិត (AI) ។

ក្រុមអ្នកស្រាវជ្រាវដឹកនាំដោយសាស្រ្តាចារ្យវីស្វកម្មអេឡិចត្រូនិកនៅវិទ្យាស្ថានវិទ្យាសាស្រ្ត និងបច្ចេកវិទ្យាទំនើបកូរ៉េ (KAIST)លោក David Hyunchul Shim និយាយថា អាកាសយានិកយន្ត PIBOT គឺជាអាកាសយានិកដូចមនុស្សលើកដំបូងរបស់ពិភពលោក ដោយផ្អែកលើបច្ចេកវិទ្យាម៉ូដែលភាសាធំ(LLM) នឹងអនុញ្ញាតឲ្យរូបយន្តដឹងពីហត្ថកម្មពីឡុតមនុស្ស ដែលសរសេរជាភាសាទូទៅ ។

លោក Shim បាននិយាយប្រាប់ទីភ្នាក់ងារព័ត៌មានរ៉យទ័រថា ពីឡុតធម្មតា អាចគ្រប់គ្រងតែល្បឿនយន្តហោះ រយៈកម្ពស់ ឬលំនឹងយន្តហោះ ប៉ុន្តែអាកាសយានិកយន្ត PIBOT របស់ពួកយើង អាចគ្រប់គ្រងអ្វីៗគ្រប់បែបយ៉ាងទាំងអស់ នៅលើយន្តហោះ ទាំងការបញ្ឆេះម៉ាស៊ីន និងពន្លត់ម៉ាស៊ីន ហើយនិងបើកយន្តហោះ ហោះឡើង និងចុះចត ពោលគឺអ្វីៗគ្រប់បែបយ៉ាងទាំងអស់ ។

នៅក្នុងស្ថានភាពបន្ទាន់ អាកាសយានិកយន្ត អាចឆ្លើយតបបានយ៉ាងឆាប់រហ័សដោយគ្មានភាពស្លន់ស្លោ ហើយនិងគណនាផ្លូវសុវត្ថិភាព ដូចករណីដែលវាអាចហៅទៅកាន់ហត្ថកម្មប្រតិបត្តិការយន្តហោះ និងនីតិវិធី Quick Reference Handbook (QRH) ភ្លាមៗ ដោយប្រើប្រាស់បច្ចេកវិទ្យា ChatGPT ។

សម្រាប់ប្រតិបត្តិការច្បាស់លាស់ អាកាសយានិកយន្ត PIBOT មានកាមេរ៉ានៅលើមុខរបស់វា នៅលើដៃ និងនៅលើផ្នែកខាងមុខនៃរាងកាយរបស់វា ដើម្បីជួយកំណត់ និងប្រើប្រាស់កុងតាក់ចុចជាច្រើន ដោយដៃរូបយន្ត នៅក្នុងបរិស្ថានរំភើបញាប់ញ័រ ហើយរកឃើញស្ថានភាពទាំងក្នុង និងក្រៅយន្តហោះ ប៉ុន្តែបញ្ហាមួយនៅត្រង់ថាតើមនុស្សយើងហ៊ានជិះជាមួយអាកាយានិកយន្តមួយនេះដែរ ឬក៏អត់? ៕