ចៅក្រមសហរដ្ឋអាមេរិក បានបញ្ជាឲ្យអាជ្ញាធររដ្ឋតិចសាស់ដករបាំងពោងអណ្តែតទឹកខា្នតយក្ស ដែលត្រូវបានដំឡើង នៅកណ្តាលទន្លេ Rio Grande ដោយការបង្កើតនូវរបាំងប្រវែង ១.០០០ហ្វីត (ជាង ៣០០ម៉ែត្រ) នេះ មានគោលបំណងរារាំងដល់ជនចំណាកស្រុកកុំឲ្យឆ្លងកាត់ព្រំដែនអាមេរិក-ម៉ិកស៊ិក។

ចៅក្រមតុលាការសហព័ន្ធអាមេរិកលោក David Ezra កាលពីថ្ងៃពុធ (ទី៦ ខែកញ្ញា) បានសម្រេចថា របាំងពោងបណ្ដែតទឹក ដែលបច្ចុប្បន្នមានទីតាំងនៅជិតទីក្រុង Eagle Pass នឹងត្រូវបានរើទៅដាក់នៅច្រាំងមាត់ទន្លេ Texas ត្រឹមថ្ងៃទី១៥ ខែកញ្ញា។

សេចក្តីសម្រេចនេះ គឺជាជ័យជម្នះមិនទាន់ជាក់លាក់មួយ សម្រាប់ប្រធានាធិបតី លោក Joe Biden ដែលរដ្ឋបាលរបស់លោក បានប្តឹងរដ្ឋនេះ ដោយលើកហេតុផលថា របាំងពោងបណ្ដែតទឹក និងយុថ្កាបេតុងដ៏ធ្ងន់ ដែលទប់របាំងនោះឲ្យនឹង រំខានដល់ការធ្វើនាវាចរណ៍ ហើយត្រូវបានដំឡើង ដោយគ្មានការយល់ព្រមពីសហព័ន្ធ។

ការសម្រេចនេះ ក៏ជាឧបសគ្គមួយផងដែរ សម្រាប់អភិបាលរដ្ឋតិចសាស់ លោក Greg Abbot ដែលបានប្រឹងប្រែងរុញច្រានយ៉ាងលំបាក ដើម្បីឲ្យមានរបាំងនេះឡើង ហើយបានតវ៉ាថា លោក Biden មានភាពធូររលុងពេក ចំពោះសន្តិសុខព្រំដែន។ ភ្លាមៗ រដ្ឋតិចសាស់ បានប្តឹងឧទ្ធរណ៍ ជុំវិញសេចក្តីសម្រេចនេះ ហើយការិយាល័យរបស់លោក Abbott បានប្រាប់ថា ករណីនេះ នឹងត្រូវបាននាំយកទៅតុលាការកំពូល ប្រសិនបើចាំបាច់៕