អគ្គលេខាធិការអង្គការណាតូ (NATO) លោក Jens Stoltenberg បាននិយាយ នៅថ្ងៃព្រហស្បតិ៍ (ទី៧ ខែកញ្ញា) នេះ ថា អង្គការសន្ធិសញ្ញាអាត្លង់ទិកខាងជើង ((NATO) មិនមានតម្រុយណាមួយ ដែលចង្អុលបង្ហាញថា បំណែកយានដ្រូន ដែលត្រូវបានប្រទះឃើញនៅលើទឹកដីរបស់ប្រទេសរ៉ូម៉ានី បណ្ដាលមកពីការវាយប្រហារដោយចេតនារបស់រុស្ស៊ីលើរ៉ូម៉ានីនោះឡើយ។

ប្រទេសអ៊ុយក្រែន បានប្រាប់ឲ្យដឹងកាលពីថ្ងៃចន្ទដើមសប្ដាហ៍ថា យានដ្រូនបានផ្ទុះនៅប្រទេសរូម៉ានី អំឡុងពេលការវាយប្រហារតាមផ្លូវអាកាសរបស់រុស្សីមួយយប់ លើកំពង់ផែអ៊ុយក្រែនឆ្លងកាត់ទន្លេ Danube។

ដំបូងឡើយ មន្ត្រីរ៉ូម៉ានីបានបដិសេធការលើកឡើងរបស់អ៊ុយក្រែននោះ ប៉ុន្តែបានក្រឡាស់ការច្រានចោលនោះវិញ កាលពីថ្ងៃពុធ (ទី៦ ខែកញ្ញា) ដោយរដ្ឋមន្ត្រីការពារជាតិ លោក Angel Tilvar បាននិយាយថា ផ្នែកខ្លះនៃបំណែកនោះ អាចជាយានដ្រូនរបស់រុស្ស៊ី ដែលបានធ្លាក់លើដែនដីរបស់រ៉ូម៉ានី។

តែអគ្គលេខាធិការអង្គការណាតូ លោក Jens Stoltenberg បានប្រាប់សមាជិកសភាសហភាពអឺរ៉ុបថា៖ «យើងមិនមានព័ត៌មានណាមួយ ដែលបង្ហាញពីការវាយប្រហារដោយចេតនារបស់រុស្ស៊ីនោះឡើយ ហើយយើងកំពុងរង់ចាំលទ្ធផលនៃការស៊ើបអង្កេត ដែលកំពុងដំណើរការទៅ»៕