​​ប្រណាំង​កង់៖ កីឡាករ​​មកពី​សាធារណរដ្ឋ​អៀក​ឡង់ Dan Martin បាន​ប្រជែង​ឈ្នះ​ដំណាក់កាល​ទី ១៧ នៃ​ព្រឹត្តិការណ៍​ប្រណាំង​កង់ Grand Tour, Giro d’Italia ខណៈ​កីឡាករ​កូ​ឡុំ​ប៊ី Egan Bernal បន្ត​នាំមុខ​រួម​ដដែល​។

​​ដំណាក់កាល​ទី ១៧ ដែល​មាន​ចម្ងាយ​ផ្លូវ ១៩៣​គីឡូម៉ែត្រ កីឡាករ​របស់​ក្រុម Israel Start-up Nation, Dan Martin បាន​មក​ដល់​ទី​ព្រ័ត្រ​មុន​អ្នក​លេខ​២ ១៣វិនាទី​គឺ​កីឡាករ​ព័រទុយហ្កាល់ Joao Almeida ខណៈ​កីឡាករ​ចក្រ​ព​អង់គ្លេស Simon Yates លេខ៣ ក្នុង​ដំណាក់កាល​។ យ៉ាង​​ណាក្តី​ក្រោយ ១៧ ដំណាក់កាល​នេះ អតីត​ជើងឯក Tour de France កីឡាករ​កូ​ឡុំ​ប៊ី Egan Bernal នៅតែបន្ត​នាំមុខ​រួម​ដដែល​មាន​វេលា​ចំណេញ​លើ​អ្នក​លេខ២ កីឡាករ​ម្ចាស់ផ្ទះ​អ៊ីតាលី Damiano Caruso ២នាទី ២១វិនាទី ស្រប​ពេល​ដែល Simon Yates របស់​ក្រុម Bike Exchange ឈរ​លេខ៣ យឺត​ជាង ៣នាទី ២៣វិនាទី​។

​​ថ្ងៃ​ព្រហស្បតិ៍​ជា​ការ​ប្រកួត​ដំណាក់កាល​ទី ១៨ លើ​ចម្ងាយ​ផ្លូវ ២៣១​គីឡូម៉ែត្រ​ប្រណាំង​លើ​ស្ថានភាព​ផ្លូវ​រាបស្មើ​។ ​ការ​ប្រកួត​ប្រណាំង​កង់ Giro d’Italia នឹង​បិទ​បញ្ចប់​នៅ​ដំណាក់កាល​ទី​២១ ថ្ងៃអាទិត្យ​ចុង​សប្ដាហ៍​នេះ​នៅ​ទីក្រុង Milan៕

​អត្ថបទ​៖​នាង សុភា​វុ​ធ