ស៊ីរី៖ រថយន្តក្រុងជាច្រើនគ្រឿងបានដឹកជញ្ជូនក្រុមគ្រួសារជនជាតិអ៊ីរ៉ាក់ ដែលរស់នៅជំរំនៅប្រទេសស៊ីរីជាអ្នកគាំទ្រ និងជាក្រុមគ្រួសារក្រុមសកម្មប្រយុទ្ធរដ្ឋអ៊ីស្លាម ត្រឡប់មកប្រទេសអ៊ីរ៉ាក់វិញ។
យោងតាមមន្ត្រីអ៊ីរ៉ាក់ និងជនជាតិឃឺតស៊ីរី ដែលស្និតទៅនឹងផែនការធ្វើមាតុភូមិនិវត្តបានឲ្យដឹងថា ក្រុមគ្រួសារទាំងនេះរួមមានទាំងស្ត្រី និងកុមារ។ រថយន្តក្រុងទាំងអស់ត្រូវបានអមដោយក្បួនកងកម្លាំងសន្តិសុខអ៊ីរ៉ាក់ រួមមានទាហាននគរបាលសហព័ន្ធ និងកងកម្លាំងចល័ត។ ក្រុមគ្រួសារទាំងអស់នេះរស់នៅក្នុងជំរំ Al-Hol ប្រទេសស៊ីរីប៉ែកឦសានចាប់តាំងពីដើមឆ្នាំ២០១៩ បន្ទាប់ពីយោធាវាយលុកធ្វើឲ្យបរាជ័យក្រុមជ្រុលនិយម ដែលធ្វើឲ្យក្រុមនេះបាត់បង់ដែនដីចុងក្រោយដែលខ្លួនបានកាន់កាប់។ ការធ្វើមាតុភូមិនិវត្តគឺជាបញ្ហាមួយ ដែលត្រូវពិភាក្សារវាងប្រទេសអ៊ីរ៉ាក់ និងមន្ត្រីសហរដ្ឋអាមេរិក ហើយបានពន្យារពេលក្នុងពេលមានការប្រឆាំងពីមន្ត្រីអ៊ីរ៉ាក់។
ជំរំ Al-Hol គឺជាទីជម្រករបស់ប្រជាជនជិត ៧ម៉ឺននាក់ភាគច្រើនជាស្ត្រី និងកុមារ ដែលបានផ្លាស់លំនៅដោយការវាយលុក ដោយយោធារបស់ក្រុមចម្រុះដឹកនាំដោយសហរដ្ឋអាមេរិក ប្រឆាំងក្រុមរដ្ឋអ៊ីស្លាម។ ទោះបីជាមានការអំពាវនាវពីរដ្ឋបាល ដឹកនាំដោយជនជាតិឃឺតនៅប្រទេសស៊ីរីប៉ែកឦសាន សំរាប់ការធ្វើមាតុភូមិនិវត្តក៏ដោយ បណ្ដាប្រទេសភាគច្រើនបានបដិសេធមិនទទួល យកជនជាតិរបស់ពួកគេត្រឡប់មកវិញឡើយ ដោយមូលហេតុថា ក្រុមគ្រួសារទាំងនេះអាចនៅបន្តពាក់ព័ន្ធជាមួយក្រុមសកម្មប្រយុទ្ធ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
