ភ្នំពេញ៖ ឯកឧត្តម គីម វីរៈ អគ្គលេខាធិការគណៈកម្មាធិការជាតិគ្រប់គ្រងគ្រោះមហន្តរាយ បានដឹកនាំប្រតិភូចូលរួមចូលរួមសិក្ខាសាលាពិគ្រោះយោបល់ស្តីពីកិច្ចសហប្រតិបត្តិការរួមគ្នាក្នុងការបង្កើតអនុស្សរណៈស្តីពីការកាត់បន្ថយហានិភ័យគ្រោះមហន្តរាយ និងការឆ្លើយតបសង្គ្រោះបន្ទាន់រវាងអាជ្ញាធរគ្រប់គ្រងគ្រោះមហន្តរាយ និងទំនប់ទឹកវៀតណាម (NCNDPC) ចាប់ពីថ្ងៃទី៨-៩ ខែកញ្ញា ឆ្នាំ២០២៣ នៅទីក្រុងហូជីមិញ ប្រទេសវៀតណាម។ 

ក្នុងសិក្ខាសាលនោះ ឯកឧត្តម គីម វីរៈ ថ្លែងថា កិច្ចសហប្រតិបត្តិការស្តីពីការកាត់បន្ថយហានិភ័យគ្រោះមហន្តរាយ និងការឆ្លើយតបសង្គ្រោះបន្ទាន់ ពិតជាមានសារៈសំខាន់ដល់ការត្រៀមបង្ការចំពោះការប្រែប្រួលអាកាសធាតុ

ដែលតែងកើតឡើងជារៀងរាល់ឆ្នាំ ដែលបញ្ហាទាមទារឲ្យបណ្តាជាប់ទន្លេមេគង្គដែលតែងតែប្រឈមត្រូវមានវិធានការរួមតែមួយ ដើម្បីឆ្លើយតបបានទាន់ពេលវេលា។ 

ឯកឧត្តម គីម វីរៈ ថ្លែងបន្តថា សិក្ខាសាលានេះ គឺជាការចាប់ផ្តើម និងជំរុញឲ្យអាជ្ញាធរពាក់ព័ន្ធតាមបណ្តោយទន្លេមេគង្គត្រៀមបម្រុងទាំងមធ្យោបាយ និងកម្លាំងសរុបក្នុងការសហការរួមគ្នា ដើម្បីឆ្លើយរាល់គ្រោះមហន្តរាយក្នុងភូមិសាស្រ្តរបស់ខ្លួន រួមទាំងបង្ការដល់ផលប៉ះពាល់អាយុជីវិតប្រជាពលរដ្ឋផងដែរ។ 

សិក្ខាសាលនេះបានរៀបចំឡើងក្រោមអធិបតីភាព ឯកឧត្តម ង្វៀន វ៉ានទៀន, អគ្គនាយករងនៃអាជ្ញាធរគ្រប់គ្រងគ្រោះមហន្តរាយ និងទំនប់ទឹកវៀតណាម និង ឯកឧត្តម គីម វីរៈ អគ្គលេខាធិការនៃគណៈកម្មាធិការជាតិគ្រប់គ្រងគ្រោះមហន្តរាយ ដោយមានការចូលរួមពីតំណាងអាជ្ញាធរគ្រប់គ្រងគ្រោះមហន្តរាយមកពីខេត្តតាមដងទន្លេមេគង្គ ចំនួន ១០ រួមមាន៖ ក្រុងហូជីមិញ, ខេត្តអានយ៉ាង, ខេត្តដុងថាប់, ខេត្តគៀងយ៉ាង, ខេត្តទៀនយ៉ាង, ខេត្តត្រាវិញ, ខេត្តកាន់ថូ, ខេត្តសុកចាង, ខេតប៊ែនត្រេ, ខេត្តប៊ិញភៀក, និងខេត្តតាយនិញ។ 

គោលបំណងអនុស្សរណៈនៃការយោគយល់គ្នានេះ ផ្តោតលើការជំរុញការពង្រីកកិច្ចសហប្រតិបត្តិការទ្វេភាគីក្នុងការកាត់បន្ថយហានិភ័យគ្រោះមហន្តរាយ និងការឆ្លើយតបជាបន្ទាន់ ដើម្បីរួមគ្នាដោះស្រាយបញ្ហាទាក់ទងនឹងគ្រោះមហន្តរាយឆ្លងដែន ដូចជាគ្រោះទឹកជំនន់ គ្រោះរាំងស្ងួត ខ្យល់ព្យុះ ការរអិលបាក់ដី ភ្លើងឆេះព្រៃ ការបាក់ច្រាំងទន្លេ និងការរញ្ជួយដី ដើម្បីលើកកម្ពស់ រួមទាំងការអភិវឌ្ឍប្រកបដោយចីរភាព ដើម្បីធានាសន្តិសុខសង្គម និងផលប្រយោជន៍របស់ប្រទេស និងប្រជាជនទាំងពីរ៕ ដោយ ៖ ឧត្ដម