អាជ្ញាធររុស្ស៊ីកំពុងរៀបចំការបោះឆ្នោតមូលដ្ឋាន នាចុងសប្តាហ៍នេះ នៅផ្នែកខ្លះនៃដែនដី ក្នុងតំបន់របស់ប្រទេសអ៊ុយក្រែន ដែលខ្លួនកាន់កាប់ ដោយការធ្វើបែបនេះ គឺជាកិច្ចប្រឹងប្រែង ដើម្បីរឹតបន្តឹងការគ្រប់គ្រងរបស់ខ្លួនលើទឹកដី ដែលទីក្រុងម៉ូស្គូបានដាក់បញ្ចូលជាឧបសម្ព័ន្ធដោយខុសច្បាប់ កាលពីមួយឆ្នាំមុន និងដែលនៅតែមិនទាន់អាចក្ដោបក្ដាប់បានទាំងស្រុង។

ការបោះឆ្នោតជ្រើសរើសរដ្ឋបាល ដែលលើកបន្តុបដោយរុស្ស៊ី នៅតំបន់ Donetsk, Luhansk, Kherson និងតំបន់ Zaporizhzhia ចាប់ផ្តើមឡើងនៅថ្ងៃសុក្រ (ទី៨ ខែកញ្ញា) ហើយបញ្ចប់នៅថ្ងៃអាទិត្យ (ទី១០ ខែកញ្ញា)។ យ៉ាងណាក្ដី ការរៀបចំនេះ ត្រូវបានថ្កោលទោសរួចហើយ ពីសំណាក់ទីក្រុងគីវ និងលោកខាងលិច។

ក្រុមប្រឹក្សាអឺរ៉ុប ដែលជាស្ថាប័នសិទ្ធិមនុស្សឈានមុខគេរបស់ទ្វីបនេះ បានលើកឡើងនៅសប្តាហ៍នេះថា៖ «ការបោះឆ្នោតនេះ គឺជាការរំលោភច្បាប់អន្តរជាតិយ៉ាងច្បាស់ជាក់ស្ដែង ដែលរុស្ស៊ីនៅតែបន្តធ្វើ ដោយមិនយកចិត្តទុកដាក់អ្វីឡើយ»។

ទីក្រុងគីវ បានបន្ថែមពីលើប្រតិកម្មនោះ ដោយសភាបានលើកឡើងនៅក្នុងសេចក្តីថ្លែងការណ៍ថា ការបោះឆ្នោត នៅតំបន់ ដែលរុស្ស៊ី «ធ្វើសង្គ្រាមយ៉ាងសកម្ម» បង្កការគំរាមកំហែងដល់អាយុជីវិតរបស់ប្រជាជនអ៊ុយក្រែន ហើយសមាជិកសភា បានជំរុញប្រទេសផ្សេងៗ កុំឲ្យទទួលស្គាល់លទ្ធផលនៃការបោះឆ្នោតនេះ។

តែអ្នកវិភាគនយោបាយ លោក Abbas Gallyamov បាននិយាយថា សម្រាប់រុស្ស៊ី ការបន្តការបោះឆ្នោតមានសារៈសំខាន់ណាស់ ក្នុងរក្សាឥទ្ធិពលនៃស្ថានភាពបច្ចុប្បន្ន ទោះបីជាវិមានក្រឹមឡាំង មិនបានគ្រប់គ្រងទាំងស្រុងលើតំបន់ដែលជាប់ពាក់ព័ន្ធក៏ដោយ៕