ពលរដ្ឋតំបន់ទីបេតិ៍ ដែលបាននិរទេសខ្លួនរាប់រយនាក់ បានមកប្រមូលផ្តុំគ្នានៅជំរំជនភៀសខ្លួនរបស់ពួកគេ ក្នុងទីក្រុងញ៉ូវដេលី និងបានធ្វើការតវ៉ានៅថ្ងៃសុក្រនេះ ខណៈមេដឹកនាំប្រទេសG20 បានចាប់ផ្តើមមកដល់រដ្ឋធានីប្រទេសឥណ្ឌាដើម្បីចូលរួមកិច្ចប្រជុំកំពូល។

ដោយស្រែកពាក្យថា«ភាពអាម៉ាស់សម្រាប់ប្រទេសចិន» និងពាក្យថា«សេរីភាពតំបន់ទីបេតិ៍» ក្រុមអ្នកតវ៉ា បានទាមទាឲ្យយកបញ្ហាតំបន់ទីបេតិ៍ មកពិភាក្សាក្នុងចំណោមមេដឹកនាំទាំងអស់អំឡុងកិច្ចប្រជុំកំពូល។

កិច្ចប្រជុំកំពូល G20 គឺជាការជួបប្រជុំគ្នាធំបំផុតមិនធ្លាប់មាននៃមេដឹកនាំពិភពលោក នៅក្នុងរដ្ឋធានីប្រទេសឥណ្ឌា ដែលនឹងចូលរួមដោយប្រធានាធិបតីសហរដ្ឋអាមេរិក លោក Joe Biden នាយករដ្ឋមន្ត្រីអង់គ្លេស លោក Rishi Sunak រជ្ជទាយាទរបស់អារ៉ាប៊ីសាអូឌីតព្រះអង្គម្ចាស៎ Mohammed Bin Salman នាយករដ្ឋមន្ត្រីកាណាដា លោក Justin Trudeau និងនាយករដ្ឋមន្ត្រីជប៉ុនលោក Fumio Kishida ស្ថិតក្នុងចំណោមមេដឹកនាំដ៏ទៃទៀត។

ទោះជាយ៉ាងណា ប្រធានាធិបតិចិន លោក Xi Jinping នឹងមិនបានមកចូលរួមក្នុងព្រឹត្តិការណ៍នេះឡើយ ហើយនឹងតំណាងដោយនាយករដ្ឋមន្ត្រីរបស់ប្រទេស គឺលោក លី ឈាង( Li Qiang) ។