ប្រទេសជប៉ុន បានប្រកាសពីអតិរេកគណនីចរន្ត សម្រាប់រយៈពេល ៦ខែជាប់គ្នា ក្នុងខែកក្កដា ខណៈការនាំចូលថាមតម្លៃទាប កំពុងកាត់បន្ថយឱនភាពពាណិជ្ជកម្ម។

មន្ត្រីក្រសួងហិរញ្ញវត្ថុ បានឲ្យដឹងថា អតិរេកមានចំនួនជិត ២,៨ពាន់ពាន់លានយ៉េន ឬប្រហែល ១៩ពាន់លានដុល្លារ គឺកើនឡើងប្រហែល ១៣ពាន់លានដុល្លារ ធៀបនឹងឆ្នាំមុន។

តម្លៃនៃធនធានថាមពលពីបរទេសដូចជាប្រេងឆៅ និងឧស្ម័នធម្មជាតិរាវ បានធ្លាក់ចុះ ដែលនាំឲ្យតម្លៃសរុបនៃការនាំចូលរបស់ជប៉ុនធ្លាក់ចុះ។ សមតុល្យពាណិជ្ជកម្ម បានក្លាយទៅជាអតិរេកប្រហែល ៤៦៤លានដុល្លារ ដែលកើនឡើង ៨,៥ពាន់លានដុល្លារ ធៀបនឹងឆ្នាំមុន។

ទន្ទឹមនឹងនេះ អតិរេកប្រាក់ចំណូលបឋម បានឡើងដល់ប្រហែល ២៤ពាន់លានដុល្លារ។ តួលេខនោះរួមមានភាគលាភ និងចំណូលការប្រាក់ ដែលក្រុមហ៊ុនជប៉ុន ទទួលបានពីក្រុមហ៊ុនបុត្រសម្ព័ន្ធបរទេសរបស់ខ្លួន។ ប្រាក់ចំណូលពីមូលបត្របំណុល បានកើនឡើង ដោយសារអត្រាការប្រាក់នៅបរទេសបានកើនឡើង៕