មហោស្រពភាពយន្តអន្តរជាតិ Toronto នៅប្រទេសកាណាដា បានចាប់ផ្ដើមហើយ កាលពីថ្ងៃព្រហស្បតិ៍ម្សិលមិញ ជាមួយនឹងខ្សែភាពយន្ត «The Boy and the Heron» (ក្មេងប្រុស និងសត្វក្រសារ) របស់អ្នកដឹកនាំរឿងជនជាតិជប៉ុនដ៏ល្បីឈ្មោះ លោក Hayao Miyazaki ដែលជាភាពយន្តគំនូរជីវចលដំបូងគេ ទាក់ទាញបានការចាប់អារម្មណ៍ខ្លាំង។

ទោះបីជាមិនសូវមានតារាល្បីៗ ដើរលើកំរាលព្រំក្រហម ដោយសារតែការធ្វើកូដកម្មរបស់តារាហូលីវូដក៏ដោយ ក៏អ្នកមកលេងកម្សាន្តក្នុងមហោស្រពនេះ អាចទន្ទឹងរង់ចាំមើលខ្សែភាពយន្តចំនួន ៥០រឿង ក្នុងរយៈពេល ១១ថ្ងៃ។

នាយកប្រតិបត្តិនៃស្ទូឌីយោ Ghibli លោក Junichi Nishioka បាននិយាយថា វាជាកិត្តិយសណាស់ សម្រាប់ភាពយន្ត «The Boy and the Heron» ដែលត្រូវបានជ្រើសរើសជាភាពយន្តបើកកម្មវិធីនេះ។

ខ្សែភាពយន្ត ដែលពាក់កណ្តាលជាជីវប្រវត្តិរបស់ក្មេងប្រុសម្នាក់ ដែលតស៊ូយ៉ាងលំបាកលំបិន ក្រោយការស្លាប់ម្តាយខ្លួននោះ ត្រូវបានគេរំពឹងថា នឹងមានការចូលរួមពេលបិទកម្មវិធីពីលោក Miyazaki។ អ្នកដឹកនាំរឿងវ័យ ៨២ឆ្នាំ ដែលទទួលបានភាពល្បីល្បាញដោសារស្នាដៃមួយចំនួន ដូចជារឿង «Spirited Away» និង «My Neighbor Totoro» មិនមានវត្តមាន ក្នុងកម្មវិធីបើកនោះទេ។

គួរបញ្ជាក់ដែរថា តារាសម្ដែងជាង ១៥០.០០០នាក់ និងអ្នកនិពន្ធ ៦៥.០០០នាក់ នៅទូទាំងសហរដ្ឋអាមេរិក ដែលបានធ្វើកូដកម្ម តាំងពីខែឧសភា បានបដិសេធមិនបន្តការថត ឬផ្សព្វផ្សាយភាពយន្តនោះឡើយ៕